好《蔘》情
星期二放假又去食好西!今次跟老婆大人同埋朋友一齊去食人蔘嘅菜式,啱晒我呢啲有年紀嘅人食補補佢嘛哈哈｡
再次嚟到尖沙咀凱悅酒店嘅凱悅軒開餐,我同老婆大人都好鍾意呢度招呼周到又坐得舒服｡
先嚟第一樣人蔘嘅頭盤紅棗人蔘豬手凍!個樣靚到好似甜品咁,其實佢係用咗人蔘雞湯整出嚟嘅啫喱凍｡
人蔘雞湯啫喱食落又爽又滑,入面仲擺咗有皮嘅豬手肉､鮮人蔘粒､紅棗同埋蜜豆,口感超級勁豐富個味仲好鬼甘香,人蔘味有得嚟又唔會太濃好易接受到｡
老婆大人最鍾意食鱔所以就叫咗呢個陳皮脆鱔過佢嘆!白鱔燒得個皮好香脆魚肉仲好鬼彈牙夠晒新鮮呀,最特別嘅係佢加咗陳皮嚟燒,食落去多咗一份甘香嘅味道出面比較少食到｡
跟住就要食呢個杞子人蔘花膠鴿吞素翅!大大隻嘅頂鴿入面有金華火腿､關西遼參同埋素翅,放入去花膠人蔘湯道一齊燉,就算你係一｢翅｣唔食嘅朋友都可以盡情咁食｡
一次過可以食到香滑花膠同濃郁鴿肉,仲可以飲埋嗰啖甘香嘅人蔘雞湯,話唔滿足都係呃人嘅｡
呢個時候梗係要整碟正菜嘆吓!豉汁蘆筍炒帶子夠晒惹味喇啩,大大隻嘅帶子好有彈性同鮮味,加埋翠綠嘅清甜蘆筍好食到不得了｡
如果你係食肉獸呢個梅欖骨就一定要試!呢個排骨肥瘦啱啱好咬落去勁彈Q仲好有肉香,重點係嗰個自家製嘅梅膏醬味道酸甜開胃,加埋鹹香嘅欖角一齊炒好食到停唔到口囉｡
繼續送俾食肉獸有呢隻脆皮香雞!呢隻新鮮龍岡雞真係雞有雞味,不過我覺得佢嘅煙燻味仲出色,除咗雞皮好香脆之外嗰朕煙燻味去到雞肉入面勁濃香｡
雖然食晏晝但點都要整個飯先至夠飽肚嘅!呢一煲係窩燒麒麟鮑魚人蔘雞飯,除咗三黃雞之外外仲有鮑魚同埋北菇,個樣睇落好似中國名菜金華玉樹雞,但其實佢係一個人蔘雞煲仔飯｡
雞肉夠鮮嫩鮑魚都好彈牙,最正係吸晒鮑魚汁嘅飯仲混咗甘甜嘅人蔘粒,加埋係令到我冇可能食淨一粒飯嘅好味道｡
呢個酥皮流沙盞有菠蘿皮又有酥皮仲要有奶黃湯丸,成粒啪口感勁豐富層次感強勁真係好鬼正｡
最近天氣唔好成日雨粉紛飛好容易令皮膚氣管出現問題!呢個時候嘆碗香滑無比嘅蛋白杏仁茶抵抗皮膚氧化亦可潤肺止咳強化支氣管,呢度嘅蛋白杏仁茶做得好香濃勁多滑嘟嘟嘅蛋白,賣$58碗隨時平過喺出面糖水舖食｡ ...更多
