嘆茶日

又到開心星期四放假喇喂！晏晝先同朋友嘆個靚茶再同老婆大人一齊去剪頭髮扮靚靚。

就喺荔枝角做嘢嘅朋友所以約咗喺好食又方便嘅大公館嘆茶。

都唔係第一次嚟不過呢道古色古香嘅裝修又真係幾鬼靚，仲有好多好靚嘅擺件地方靚嘢食都會加分啲。

朋友未到嘆杯靚茶食住個前菜烤麩等，唔好以為餐前小食好hea啊呢個烤麩好入味口感好得㗎。

四個人指手畫腳咁叫咗啲點心一齊食！呢個黃椒醬鱈魚餃好好味，不過如果你同我一樣唔食得辣就千祈唔好食面頭嘅黃椒醬，其實個醬先至係靈魂但係辣度實在唔惹少！我都係交俾老婆大人幫我搞掂佢。

跟住呢個金瑤菠菜苗龍蝦餃就溫柔好多喇！煙煙韌韌嘅餃皮入面有爽口彈牙嘅龍蝦仲有滑嘟嘟嘅菠菜苗，有鮮味又有菜嘅甜味呢個餃好食喎。

不過呢粒黑魚子流心鵪鶉蛋燒賣仲頂癮！燒賣入面有一粒鵪鶉蛋當然唔係以前茶樓實的的嗰啲啦！

咬開之後入面係隻流心嘅鵪鶉蛋，食落去除咗有肉香仲有蛋香，加埋黑魚子嘅鹹香呢粒燒賣真係好鬼和味。

我兄弟姊妹多細個飲茶想食灌湯餃好難喇！不過有質素嘅灌湯餃而家都唔係周圍食到，大公館呢個瑤柱冬蓉灌湯餃我係有信心嘅。

灌湯餃外皮唔會好厚入面除咗冬瓜蓉仲有好鬼鮮味嘅江瑤柱，加埋個清甜上湯呢個灌湯餃我鍾意喎。

嚟呢度梗係要食返個樣可愛到不得了嘅黑毛豬咸水角！鹹水角個皮幾香脆入面嘅餡係用黑毛豬肉，食落嗰朕肉味梗係濃香啲。

飲茶食腸粉是常識吧！我哋就叫咗口感豐富啲嘅龍皇脆米腸粉，又薄又滑嘅腸粉皮包住脆米同埋蝦肉，入口先係滑嘟嘟然後又脆卜卜咁好過癮。

不過講到今日嘅驚喜肯定係呢條麻辣鴨紅雞絲春卷！諗都冇諗過麻辣鴨紅可以做春卷餡，食落去有小小嘅辣味但又脆卜卜咁，呢個口感同埋味道又真係幾得意喎。

最後叫咗兩個甜品點心！呢個係金沙冬蓉手袋酥成個手袋仔咁好鬼cute，酥皮入面原來係鹹蛋黃冬瓜蓉，食落鹹鹹甜甜嘅味道都幾吸引㗎喎。

嚟呢度飲茶金箔懷舊芝麻卷係唔可以唔食嘅！入口又爽又滑仲有勁濃嘅芝麻味真係好鬼正。