開心禮拜日

呢個禮拜日雖然要返工但係老婆大人就我約咗朋友喺中環一齊食晏，仲要食半自助餐啱晒我呢個過氣黑洞。

我哋就係去呢間木子園早兩日食過晚飯見呢度三百幾蚊就食到個半自助早午餐，有點心有片皮鴨有上海嘢仲有川菜，我哋三個人嚟食各自都有鍾意嘅嘢食到啱晒合尺。

去到大門口見到呢兩張吊椅啱晒啲靚女喺度打卡，餐廳仲有好正嘅裝飾櫻花樹成個世外桃源咁款靚到唔似食中菜嘅餐廳。

不過我覺得最正嘅係呢間餐廳有一個標準嘅酒吧，有好正嘅雞尾酒仲有好多其他靚酒飲。

我哋今日食呢個半自助餐就可以加$188 喺兩個鐘頭入面任飲紅白酒、意大利氣泡酒、支裝啤酒、汽水同埋果汁，對於我呢啲酒鬼回本容乜易吖。

老婆大人唔鍾意甜所以佢就揀咗飲呢個青檸梳打，我偷飲咗一啖真係好香青檸味最緊要夠氣呢杯合格呀。

講明半自助餐梗係會有一啲嘢食係自助任攞嘅！呢度擺咗啲冷盤同埋炸點心，全程係不停添加唔使驚想食嘅時候要等。

細心嘅老婆大人每樣攞咗啲返嚟同我哋一齊食，香口點心有我鍾意嘅叉燒焗餐包，跟住仲有蒜香蝦春卷同埋炸小饅頭，擺喺道都保持到幾熱同埋香脆口感算唔錯。

湯就有兩款可以揀辣我梗係鍾意唔辣嘅蟹肉粟米羹多啲啦！不過嗰個素嘅酸辣湯味道都幾唔錯，不過對我嚟講真係辣咗少少囉。

呢碟冷盤嘅醉雞夠嫩滑同埋整得好入味，青瓜木耳酸酸地幾開胃，四喜烤麩都整得好夠味唔會太甜太鹹，如果鍾意清新嘅呢個鴨胸沙律有味得來又爽口，頭盤開咗個好靚嘅序幕希望嚟緊嘅點心、北京填鴨同埋主菜都咁正啦。

呢個半自助餐相信最吸引肯定係任食嘅北京填鴨，新鮮熱辣出爐嗰浸香氣真係好令人流口水。

師傅一刀一刀將鴨皮片出嚟呢下係聽到個皮嘅脆聲！跟手夾啲青瓜同埋京蔥攞埋個嬤嬤皮拎返入去一齊食。

個片皮鴨好香鴨油嘅味道仲要一啲都唔臊勁好食，我哋足捫拎咗咁嘅份量三碟嚟食哈哈。

呢道嘅點心有10幾款每次嗌就兩件起跳我哋都差唔多叫晒嚟試！點心嘅質素都幾平均吓算係食得過，咁多款入面我就最鍾意陳皮牛肉球、魚肚四寶雞扎同埋馬拉糕。

食咗頭盤、北京填鴨同埋點心都已經飽咗九成，但呢個話明係半自助餐即係有主菜啦！我哋每人可以揀一款主菜估唔到個份量大得咁誇張，我就醒呀食到咁飽梗係嗌個菜啦，呢個係茶樹菇上湯小豆苗清甜爽口用嚟解滯啱晒。

鹹蛋蝦球爽口彈牙加埋甘香嘅鹹蛋黃好邪惡，不過又真係好好味呢個真係要嗌嚟試吓。

點都要嗌返個辣菜俾我老婆大人食嘅！呢個公爆雞丁原來都幾鬼辣嗰喎！不過辣得嚟又好香口仲有啲雞粒好滑唔會鞋口唔錯唔錯。

甜品有生磨蛋白杏仁茶同埋楊枝甘露可以揀，兩個之間如果要我揀我就會鍾意楊枝甘露多啲，因為食到咁飽酸酸甜甜嘅味道易入口得多。