2024/08/29

慢活西貢 · 心機Cafe

鍾意到西貢遊車河,周圍探索一下唔同嘅cafe,平常會到西貢市中心,今次經過大埔仔見到新開嘅｢Upsidedown Coffee｣,附近又有好多錶位,就一於停低去試吓｡搭交通工具都好方便,係西貢到將軍澳必經嘅道路｡ Cafe店面唔算好大,但座位格局休閑舒適,仲有少少戶外空間,工業風設計,灰水泥牆､木枱藤椅,播放住耳熟能詳嘅經典英文歌,自然嘅氛圍予人慢活嘅感覺,喺度嘆杯咖啡,勁chill｡三頁menu唔算多,但已經能夠滿足我,食物賣相同質素,絕對勝過出面好多西餐廳,喺附近住的話必定會常去｡ 𝄪 𝘚𝘮𝘰𝘬𝘦𝘥 𝘴𝘢𝘭𝘮𝘰𝘯 𝘤𝘳𝘦𝘢𝘮 𝘤𝘩𝘦𝘦𝘴𝘦 𝘤𝘳𝘰𝘧𝘧𝘭𝘦 煙三文魚芝士牛角包窩夫 $88 賣相吸引,通常食牛角包窩夫都係甜食,今次係第一次食鹹,煙三文魚份量多,又夠大片,配上cream cheese好match,牛角包壓成窩夫夠酥脆,充滿牛油香,亦可以轉配酸種麵包,配上新鮮羽衣甘藍沙律菜｡ 𝄪 𝘊𝘩𝘪𝘤𝘬𝘦𝘯 𝘢𝘯𝘥 𝘤𝘩𝘦𝘦𝘴𝘦 𝘲𝘶𝘦𝘴𝘢𝘥𝘪𝘭𝘭𝘢𝘴 芝士雞肉烤餅 $98 墨西哥餅皮烤至微熱,表面焦脆,好香麥味｡雞肉加入溶咗嘅車打芝士同水牛芝士,黏著餡料有拉絲口感,入口清新,配埋淋上柚子醋嘅沙律菜,酸酸的好開胃,感覺好健康｡ 𝄪 𝘉𝘭𝘢𝘤𝘬 𝘵𝘳𝘶𝘧𝘧𝘭𝘦 𝘮𝘶𝘴𝘩𝘳𝘰𝘰𝘮 𝘴𝘱𝘢𝘨𝘩𝘦𝘵𝘵𝘪 𝘸𝘪𝘵𝘩 𝘤𝘳𝘦𝘢𝘮 𝘴𝘢𝘶𝘤𝘦 黑松露忌廉蘑菇意粉 $108 一上枱已經聞到黑松露香氣,黑松露醬毫不吝嗇裹滿每條意粉,仲有洋蔥同蘑菇｡意粉軟硬度剛好,就係我鍾意嗰隻偏硬硬哋嘅彈牙口感,仲要勁掛汁｡一入口好creamy,黑松露香氣超濃郁,喺口腔擴散然後停留｡睇佢唔算好大碟,但份量都幾多,食唔停口都幾飽｡ 𝄪 𝘊𝘩𝘰𝘤𝘰𝘭𝘢𝘵𝘦 𝘭𝘢𝘷𝘢 𝘤𝘢𝘬𝘦 心太軟 $48 烤得溫熱,蛋糕外層酥脆,裡面係溫暖嘅流心朱古力漿,朱古力味濃郁,細滑香甜｡ 𝄪 𝘖𝘳𝘦𝘰 𝘤𝘩𝘦𝘦𝘴𝘦 𝘤𝘢𝘬𝘦 Oreo芝士蛋糕 $54 芝士蛋糕細滑creamy,芝士味香濃又低甜,加埋Oreo朱古力曲奇碎,口感豐富,甜度剛好｡ 𝄪 𝘋𝘪𝘳𝘵𝘺 髒髒咖啡 $48 我鍾意飲Dirty特別嘅反差感,飲時唔好攪勻,溫熱濃烈風味嘅Espresso倒入冰牛奶,一啖可以同時感受到由濃到淡,冷熱交流嘅口感｡ 𝄪 𝘏𝘰𝘫𝘪𝘤𝘩𝘢 𝘭𝘢𝘵𝘵𝘦 焙茶拿鐵 $55 焙茶充滿濃厚茶香,同牛奶比例調配得很好,低甜,口感順滑｡ #Upsidedown Coffee @upsidedown.coffee.hk 地址:西貢清水灣道大埔仔村8號地舖 #黑松露意粉 #dirty #牛角包窩夫 #大埔仔 #西貢美食 #香港美食 #香港美食推介 #香港探店 #hkfoodies #foodieshk #hkigfood ...更多