2023/07/31

繽FUN仲夏自助晚餐

#夏日打卡日常繽FUN仲夏成班好友聚首一堂，難得齊人見面，一於到花月庭嘆返個自助晚餐，有齊一系列醒胃美食、潮洲滷水美食、即煮拉麵以及各式各樣意式海鮮、即開生蠔、巨型梳乎厘等等，食得飽飽棒住個肚走，又可以傾足一晚，開心聚會!! 餐廳經裝修後變得更明亮光猛，座位闊落舒適，空間感足。特別一讚食物區劃分得夠清晰，排列整齊有序～飲品區提供無限暢飲，推介凍柑桔綠茶及檸檬薄荷水，清爽又解暑！亦有自助咖啡機～是夜自助晚餐以繽FUN夏日美食巡禮自助晚餐為主題，必食各款意式海鮮，特別推介即開生蠔、火炙龍蝦、瀨尿蝦及鱈場蟹腳！沙律區有多款新鮮沙律菜，可隨喜好配上香甜車厘茄、健康乾果等，之後再淋上自選沙律醬汁～冷盤有意大利沙樂美腸、煙三文魚、煙鴨胸等，當然唔少得我最愛既芝士拼盤，有齊四款選擇！發達芝士藜麥西瓜沙律及日式溫泉蛋同樣吸引！我更一口氣食了2隻滑溜溫泉蛋～即開生蠔Keep住都有人龍，海水味及鮮味都好出色，大大隻，夠哂肥美creamy，可以任取真係岩哂一眾生蠔迷！日式美食有刺身、壽司、串燒、天婦羅、日式小食、冷烏冬、蕎麥麵等，最愛鮮美爽脆馬刀貝及魚油豐盈三文魚；香蔥吞拿魚軍艦濃郁甘香；柚子胡椒松葉蟹肉脆餅，啖啖鮮甜蟹肉拌以清香柚子胡椒，再配脆餅同食，口感層次豐富；章魚燒外酥內嫩，味道濃厚；櫻花蝦蒸蛋滑嫩香甜。熱食另推介煙肉芝士焗蠔，生蠔焗至半生熟，流住豐富肉汁，芝士味香濃～火炙黑松露忌廉汁波士頓龍蝦成隻手掌咁大，蝦肉爽口彈牙有嚼勁～野菌牛油寬條麵煮得剛好，闊條麵煙煙配以濃厚香滑醬汁～紅酒雜菜燴牛尾肉質軟淋，炆煮得好入味～每四位客人獲贈乙客迷你佛跳牆都相當出色，有齊海參、鮑魚、花膠、瑤柱、花菇、金華火腿等材料，湯頭啖啖鮮香四溢、味美湯濃～肉肉愛好者必食燒羊架及燒紐西蘭牛扒，羊架口感鮮嫩無羊羶味，紐西蘭牛扒肉質緊緻富嚼勁，瘦肉與脂肪比例剛好～最後到我最愛既甜品區，多款水果包括火龍果、西瓜、蜜瓜等，可以配朱古力火鍋同食，大人小朋友都咁鍾意～仲有麵包布甸、蓮蓉西米焗布甸等，估唔到有即製雞蛋仔同老婆餅，雞蛋仔鬆軟且蛋香味濃，風味十足～特別一提，巨型梳乎厘為限定甜品，分18:45、20:45兩個時段推出，梳乎厘充滿空氣感，口感輕柔，再淋上鹹甜芝士汁，芝士控既我大愛！甜品區真係包羅萬有，甜品控可以盡情享受被甜品包圍既感覺！！...更多