2023澳洲搵工記-下集

用咗半個禮拜時間安在家中搵工，未到步先搵到，得咗！ 等我講吓小弟今次不靠朋友不靠人脈嘅求職經驗。其實本身我諗住搵設計管理(但搵工網完全冇呢個職位，其他省可能有)。 HR寫電郵問我有冇興趣做另一範疇，我有相關經驗但不是我的首選。最初只係諗住用呢次面試做見工練習，以『唔買都睇吓』嘅心態去見。之後又諗有工做好過喺屋企量地浪費光陰，份工仲要係肯定做到2024 。我乜都唔驚，就係最驚冇收入、驚窮。建設吓呢個城市嘅新地標都算係對呢個新終主國嘅一種貢獻(雖然比起香港嘅造價同難度真係唔係嗰皮)。最緊要係冇當地工作經驗都肯請算係唔話得。 寫CV 篇 澳洲公司會用軟件scan 你份CV入電腦來叮走唔相關唔合適嘅人，所以有一些key words 必定要寫: 1. 寫本地住址同post code。 2. 寫Visa type 同該visa type可以做的工種。冇有效嘅簽證，你個CV會直接去垃圾桶。聽講持PR 會較容易搵到工，其他要顧主sponsor 嗰啲未必咁易揾到。 3. 寫預計開工日期(最好可以立即開工)。 4. 列出澳洲認可的專業牌照。 5. 列出工作技能。 6. 列出有關工作經驗（最好有本地工作經驗或同澳洲公司有關的工作經驗，因為澳洲人唔會太承認海外工作經驗，所以一早已經有心理準備)。所以小弟在見工時大部份時間講術我在香港做過的兩間澳洲公司嘅經驗。 7. 千祈唔好誇大或太沙塵，因為澳洲人好鍾意做低啲自大狂。 8. 可以放LinkedIn 連結 9. 基本上語言方面我冇寫自己識中文，因為覺得冇乜特別用途。唔通會特登請我睇嗰國家生產嘅玻璃幕牆同預制件咩？ 搵工篇 網頁 * 嗰間公司嘅網站(唔經獵頭快好多!) * Seek * LinkedIn  * Indeed * Glassdoor 獵頭 * Hays  * Capstone  面試篇 1. 準備 5 分鐘簡短精要厲害嘅自我介紹。 2. 記住人揀我我揀人，問清楚如受僱後實質要跟咩工作、工作時間等，以免上工後有落差。 3. 可以問啲問題俾佢感覺到你好想嚟做嘢，同埋想做得長久。 4. 俾人感覺到你肯同其他人溝通同想融入公司。 5. 俾人感覺到你有擔帶同誠意 6. 俾人感覺你有準備而來。 7. 盡量輕鬆啲隨和啲 小弟其實只係報咗兩份工咁大把。所謂做生不如做熟，兩間都喺以前喺香港分公司做過，見咗第一間已經極速地有好消息。今次真係太好彩。又咁講，佢請到我可能都係佢好彩……我嘅資歷…..我嘅收入….. 我嘅身段已老早放下。 Reference 篇 澳洲啲公司係會叫你以前嘅腦細/同事寫推薦信。雖然我五年前個line manager 而家正正喺嗰間公司做緊，但我今次冇打攪佢，因為幾個禮拜前去咗呢個line manager當年個大腦細屋企天台燒烤gathering，大腦細自動請纓話幫我寫(都話工作上識多啲朋友係好過識字、仲有用過讀多個master!)。至於我而家個腦細就叫我幫佢草擬埋封推薦信俾佢。正! 我可以讚到自己天上有地下無！(後記: 腦細話佢從冇填過一個咁煩氣咁長盡咁費時嘅reference. 仲冇得copy and paste, 又要俾例子…使唔使咁嚴謹？) 隔咗一日竟然喺LinkedIn In-box 收到個見項目經理啲邀請…. 澳洲喺咪真係咁缺人啊？咁點算呀？好吸引呀！不過又咁，冇本地工作經驗邊夠本地人爭？都係做啲唔使孭咁重飛咁大責任嘅工種涯一年先再轉吧。可能做做吓有得起奧運場館呢😀 之前我個篇<移民前的90天>有講過一個英國仔，我諗我唔會話俾佢聽我地又會再次同佢做同事，亦都唔會係LinkedIn公布，因為佢一定會話我冇出色做埋啲低級工。但又咁講，佢係識人碌人情卡先做到呢個位(他也是零local experience)但人鬼殊途，白人嘅際遇一定會唔同㗎啦。 正所謂萬事起頭難，起咗個頭就自然會有路行，好過有啲極度專業人士淨係喺屋企量地、FF、不斷搵籍口唔搵工。不過唔緊要，屋企有一個人有收入已經好好啦。 我都有問過自己，點解我唔直接搵人介紹咪得囉。但係其實我覺得如果可以靠自己能力搵到嘅話都盡量自己搵。前同事不是老奉要幫我，自己也不想受人家太多恩慰。但亦心知自己搵到嗰啲應該唔夠人哋介紹嗰啲咁好(可能係自己面皮太薄掛)… #澳洲搵工 (此文章由U Blog 同步發佈至社群)