喺K11商場行出嚟就見到呢間泰國餐廳門口企左好多人，天氣熱熱地食泰國菜就最啱。
打開menu，好多嘢食，勁吸引。更吸引係尖沙咀區嚟講價錢非常親民，到上菜時更見到大大碟，份量足，絕無將貨就價。
🥬肉碎生菜包$72
味道豐富而有層次，入口係檸檬嘅香同酸味，仲夾雜住香茅嘅清香，然後慢慢有洋蔥嘅甜味，最後係辣椒與香料嘅辛辣，味道極豐富嘅炒肉碎。
🌶青咖哩羊架 $108
上菜時見一碟竟然有3件羊架，咬落啖啖肉又夠腍，配上微辣帶香嘅青咖哩一齊食，很惹味。
🥙印度薄餅 $32
有6件大大件嘅薄餅，金黃香脆，沾咖哩食又唔會太黏汁，小小汁附在薄餅上，味道啱啱好。
🍹菠蘿沙冰 $38
食左咁多濃味嘅食物，一杯清香嘅菠蘿沙冰，簡直係絕配，入口唔會太甜，沙冰在口腔內慢慢融化，透心涼，亦中和了食物嘅辣味。
本來仲想食埋甜品，見到有芒果雪糕糯米飯😍，有芒果、有雪糕、仲有糯米飯，超吸引，但係呢度嘅食物真係好足料，個胃已經再無空間，唯有留返下次再嚟先食。
新泰東南亞餐廳
尖沙咀加拿芬道25-31號地下1A及地庫
