大師嘅味道
好多年前已經鍾意Bosco師傅嘅手勢!事隔多年可以再次食返大師級嘅味道真心正呀喂｡
呢日放假食好西走咗去帝逸酒店嘅逸軒探吓Bosco師傅!
今次嚟食要早72個鐘預訂嘅師房宴,一坐低就有酒飲呢啲咪幸福囉!酒主下次記得唔好揸車我要攞支好嘢嚟同你飲'?｡
廢話少講即刻開波!第一味係紅油椒醬輕煎富貴蝦,睇佢個樣好似好鬼辣咁好彩食落去香勁過辣,加埋新鮮剝殼嘅瀨尿蝦食得好鬼爽皮｡
跟住呢個辣清酒煮昆布鮑魚睇落唔辣反而最刺激!鮑魚食落去好腍滑仲煮得好入味,鍾意食辣嘅老婆大人就食得鬼死咁開心｡
着晒火嘅係女兒紅南乳無骨脆皮雞!我哋呢啲酒鬼聞到女兒紅嘅味點會唔開心吖｡
等啲火燒晒就可以好好咁虞呢件勁香嘅雞!外面好香脆仲有好濃嘅南乳味,最正嘅係雞肉入面仲係嫩滑有肉汁嘅呢個雞真係好好食｡
嘆完好味嘅雞仲有靚湯飲!原個椰皇濃厚花膠超級濃郁,熱辣辣飲落去有好濃嘅椰子味勁香甜｡
燉湯入面仲有好厚嘅花膠咬落去好爽滑勁有口感,除咗啲女人鍾意之外連我呢啲麻甩佬都話正呀!椰皇入面嘅肉好香滑好甜我一啲都冇放過｡
跟住呢個係羅望子汁香茅泡沫煎星斑柳!嗰啲白雪雪嘅泡原來係用又酸又香嘅羅望子同香茅整嘅,配嗰件煎得勁香脆嘅厚身星斑柳味道好夾喎｡
海鮮湯本灣龍蝦白玉入面嘅龍蝦爽口彈牙好有鮮味,下面白雪雪嘅係蒸蛋白同海鮮湯一齊食滑嘟嘟又鮮味,仲內有乾坤原來有麻糬喺蒸蛋白入面,食落多咗啲煙靭嘅口感幾過癮喎｡
乾燒百花脆皮花膠伴溫室小甘筍個汁辣辣地好惹味,脆皮花膠包住啲彈牙鮮味嘅蝦膠,食落去又香又脆最緊要係唔油膩嗰吓正嘛｡
飽肚嘢有呢個雙蒜A5和牛飯件燶邊日本雞蛋!嗰隻雞蛋鬼鬼馬馬咁用特別方法令到香口得嚟蛋黃唔會過熟係有心思嘅,不過鍾意食牛嘅我就更加like A5和牛,外面焦焦香入面軟淋油香滿瀉,加埋啲蒜片同豬油渣一齊食嗰啖飯真係好食到不得了｡
最後甜品係沖繩黑糖北海道赤肉蜜瓜冰粉,老婆大人最鍾意食呢個甜品,唔難明點解嘅又爽口又香甜呢個味道係好多人鍾意嘅包括我｡
逸軒
電話:36531112
地址:沙田源康街1號帝逸酒店2樓 ...更多
