蒸鮮

又到同老婆大人、朋友一齊去食大餐嘅好日子！今次我哋去食蒸氣火鍋勁多嘢食飽到一個點呀。

我哋今次揀咗去九龍酒店嘅倚窗閣開餐，初初仲以為食自助餐原來佢間咗少少位尊做呢個蒸氣火鍋。

食呢個蒸氣火鍋套餐可以用$38額外嘆任飲，可以揀紅白酒、啤酒、汽水仲有咖啡同埋茶，咁鬼抵梗係要加錢任飲啦。

蒸氣火鍋方面我哋揀咗鱻上鮮套餐！除咗海鮮之外仲有好多嘢食其中一樣就係刺身拼盤，入面有北海道帶子、三文魚、油甘魚同埋紅蝦，全部都好啱我心水尤其係油甘魚夠晒新鮮魚味香濃。

跟住仲有蜜汁西班牙黑毛豬叉燒，之前食中菜試過叉燒好唔錯今次又有得食開心到彈起，叉燒一貫整到好腍好香最鍾意佢唔會好甜食多兩件都唔會覺得漏。

男士們好開心因為有生蠔食嘻嘻！兩隻生蠔分別係愛爾蘭同埋美國貨兩款都好新鮮，講到我鍾意嘅梗係愛爾蘭生蠔啦。

食完第一part係時候調個靚醬預備食蒸海鮮，淨係醬汁同埋配料都已經有10幾款，點都搵到自己啱心水配搭喇啩。

呢個海鮮拼盤一上枱大家都嘩嘩聲！因為入邊有波士頓龍蝦、扇貝、鮑魚、大顯同埋海蝦，全部都好鬼新鮮，快啲攞去蒸快啲攞去蒸好心急呀。

呢個扇貝已經加咗粉絲同埋蒜蓉蒸幾分鐘就食得！鮮甜嘅扇貝配咗濃味嘅蒜蓉醬夠晒重口味點會唔好食呀。

咋咋臨蒸爆哂膏嘅波士頓龍蝦啦！蒸熟嘅龍蝦殼紅噹噹入面嘅肉就白雪雪顏色好靚，食落去又爽口又彈牙嘅龍蝦肉好鬼鮮甜，食完成口都係鮮味同埋膏嘅甘香正呀喂。

跟住仲有蜆同埋大蝦呢兩味嘢新鮮就一定好食。

龍蝦鉗我哋就留返同鮑魚一齊蒸因為時間差唔多嘛！龍蝦鉗啖啖肉梗係好食，鮑魚唔係好大粒不過勝在夠鮮甜都唔錯。

鍾意食魚嘅老婆大人見到呢個沙巴龍躉肉已經流晒口水！終於等到蒸佢5分鐘就搞掂好快可以食，龍躉食落去一啲都唔腥仲好有魚香好食喎。

跟住就輪到我最鍾意嘅牛肉！安格斯牛小排擺到成朵花咁樣好好打卡，唔止樣靚食落好滑溜牛味仲勁香濃添好掂呀。

唔食牛嘅老婆大人就有呢個醉雞可以嘆！醉雞幾入味食落真係有陣陣酒香，而且雞肉好有彈性絕對係新鮮雞。

食咗咁多海鮮同肉梗係要整返啲菜平衡吓啦！呢個蔬菜籃有菜有瓜仲有菇好豐富，大家都會搵到自己鍾意食嘅蔬菜就一齊健康吓啦。

食到呢度我哋仲有個鮮甜嘅湯底唔好嘥要嚟整咗個蠔仔泡飯嘆！肥嘟嘟嘅蠔仔好鮮加上鮮甜到一個點嘅湯底，煮出嚟嘅蠔仔粥實在令我太好味喇。

喂喂喂未完㗎我哋叫呢個餐仲可以任食自助餐嘅甜品！好多雪糕、蛋糕仲有甜點任攞任食都咪話唔爽，如果想食呢個蒸氣火鍋記得早兩日預訂啊。