2025/03/07

萬聖節的甜蜜滋味

之前聽聞海洋公園萬豪酒店的海灣餐廳的自助餐質素唔錯，一直都好想去試，幾個月前終於等到佢做買一送一優惠兼同朋友夾到時間，可以到此品嚐期待已久的lunch buffet，咁啱撞正萬聖節前夕，有萬聖節佈置(圖1至圖3)，仲有好多萬聖節造型的甜品，款款都好精緻，打卡度好高，味道當然都有番咁上下，真正睇得又食得。萬聖節造型，通常都離唔開鬼怪、南瓜、骷髏頭、墳墓等等，今次都唔例外，原個蛋糕有南瓜鬼怪菠蘿熱情果蛋糕(圖4) 、眼球鮮果忌廉蛋糕(圖5) 同骷髏頭黑芝麻紅豆慕絲蛋糕(圖6) ，靚到唔捨得切開，所以擺左好耐都無人去切，仲維持住完整狀態。其他的萬聖節甜品都係細細件的的骰骰的糕點，包括圖7的木乃伊迷你檸檬蛋白撻、眼球金箔斑蘭蛋糕、蠟燭朱古力慕絲蛋糕、鬼怪雜莓芝士餅、墳墓開心果紅桑子慕絲蛋糕同南瓜慕絲蛋糕，仲有體積較大的眼球朱古力冬甩(圖8)。蛋糕味道偏甜，但我就是喜愛較甜的甜品! 檸檬蛋白撻的撻皮實得來夠脆，好有口感，識食一定係食撻皮。至於軟身的甜品，有圖9的南瓜水信玄餅、眼球芒果布甸同骷髏頭啫喱，同埋無萬聖節裝飾但一樣咁好味的法式焦糖燉蛋。除左睇得又食得的甜品外，其他無節日裝飾的甜品都一樣有水準，味道有過之而不及。包括有5種口味的曲奇餅(圖10)，味道夠香濃仲好香脆，食晒5隻味已經好飽。又有色彩繽紛的馬卡龍(圖11)，甜而不膩。而撻都有鹹同甜的選擇，分別係海鮮撻同葡撻(圖12)，撻皮好酥脆，蛋漿夠香濃，令人想食多幾隻。至於非甜食/熱食就相對實而不華，海鮮款式唔少，連麵包蟹都有(圖13)。雖然我唔太鍾意食海鮮，但望落都好新鮮，味道應該都不錯。其他熱食就唔逐一介紹了，因為真係有好多款，加上要留肚食甜品，所以未能一一嘗試。個人較喜歡的熱食有菠蘿咕嚕肉(圖14)，咕嚕肉炸得香脆有咬口，酸酸甜甜惹味開胃。另一樣係印度脆薄餅同印度烤餅(圖15)，前者鹹鹹地卜卜脆，香口到食完又想再食；後者跟搭配的香料味道好夾，提升了烤餅的滋味。仲有一樣係豬鞍(圖16)，睇落好似「鞋鞋地」，但食落都幾嫰滑，好好趙一點都唔韌。食左咁多野，在飽到上心口的狀態下以一杯Haagen-Dazs雪糕(圖17)作結，係我之前從未食過的紅絲絨芝士餅味。雖然萬聖節主題唔係賣靚或者fancy，仲有點恐怖，但真係好有特色同氣氛。今餐真係超大滿足，帶來視覺同味覺的雙重享受，充滿甜蜜的滋味。 #心意曲奇 ...更多