呢日同一班老友走咗去九龍酒店龍逸軒食懷舊菜,真係食返到細個嘅味道個個都食得好滿意｡
呢個懷舊宴有10個菜大食如我都捧住個肚嗌飽走!第一味係大紅香芒乳豬好有去飲嘅感覺,香脆嘅乳豬油分好夠配酸酸甜甜嘅芒果食落去冇咁油膩感覺都幾得意｡
燉湯係菜膽螺頭燉海參,入面有成條海參真係好鬼慷慨!加埋菜膽､螺頭同埋雞腳呢啖湯係好鬼香甜呀｡
桂花炒魚翅整得好乾身唔會油淋淋!入面仲有新鮮嘅蟹肉口感同味道都好得｡
跟住呢個砵仔焗魚腸係我老婆大人嘅飛佛!蛋焗得好甘香加埋魚腸整得乾淨冇腥味,呢個焗魚腸味道係唔錯嘅｡
香煎美國生蠔夠晒肥大厚肉,炸到香香脆脆咁加埋鮮味點都好食嘅｡
呢碟枝竹豆腐炆海星斑我哋咁多人都一致讚好!炆得好入味魚肉又香滑,側邊嘅枝竹同埋豆腐都係正嘢嚟㗎手快有手慢無｡
呢個碧綠蝦子柚皮真係勁懷舊嘅手工菜!淨係揸柚皮都要用幾日時間,呢個柚皮整得好鬆化又冇澀味,加埋啲鹹香蝦籽同埋個芡汁真係好高質｡
古法八寶鴨又係巧手菜之一!去咗骨嘅鴨入面釀咗啲鹹蛋黃､蓮子､薏米同埋糯米,跟住炆到好酥香配埋個濃郁嘅醬汁真係好味道｡
最後仲有兩個甜品!一個係蓮蓉西米焗布甸另一個就係懷舊芝麻卷,食到太飽嘅關係甜品就意思意思食少少算!不過兩個味道都唔錯好鬼滿足呀｡
