2024/06/10

萬人放天燈何奇壯觀

原本打算順序將我們來到清邁的經歷和心得寫出來，大概才寫到頭一星期（即一個月前）的事，但這邊超熱鬧的水燈節慶典剛剛過去，很想及時跟大家分享，所以就先寫兩篇「水燈節特集」插隊發佈。剛過去的11月8日（泰曆十二月十五日月圓夜）是泰國以至老撾、斯里蘭卡等地隆重其事的水燈節（Loi Krathong），泰國全國都會點燃水燈慶祝，萬家燈火，藉此祈求平安順景，而北部的清邁更會同時慶祝天燈節（Yi Peng Festival），這和北部的蘭納文化有關。「Yi Peng」的意思就是蘭納曆的第二個圓月，喺呢個宗教節慶期間，最壯觀必數萬人放天燈活動，被譽為泰國七大奇蹟之一，一連兩天舉行，入場費成千港元，在這裡可說非常昂貴。今年水燈節撞正「血月」月全蝕，難得的巧合。我們兩個雖然被入場費嚇了一跳，但還是「不惜工本」，兩星期前訂定門票，會一會呢個有今生冇來世嘅盛事。成千元只是普通飛，VIP票更揦脷，我們就「平平哋」玩下算了（其實由訂票一刻，老婆就鬼咬咁聲不斷呻貴）。下午3時半，Maya噴泉集合，嚟清邁咁耐從未見過咁多遊客，洋人、日本人（好多）、大陸人、黑人，五湖四海。排長龍等候大會安排的雙條車，等了超過一小時才啟程。一小時高速公路後，轉入小路行駛15分鐘，兩旁都是老舊小屋和樹。就快瞓著之際終於到達了西南市郊的大會場地，無數汽車停在一大片空地上，兩條氣球魚飄下飄下迎賓，有天燈拖著煙花尾巴直飛上天。第一件事排隊登記，領取劃位入場證同「紀念品」小布袋乙個，多謝晒！跟著走進一條彩燈隧道，日落時分，節目正式開始。肆意打卡一輪之後，取了一籃子蘭納晚餐，包括一隻齋糭、一包燒香蕉、一包脆口小食、一支水和一個桔（最好食係個桔）。現場還有熱辣辣的即製食品供應，因宗教節日關係，全素，有煎糯米餅、椰汁丸子、炸芋條等等，好好食就唔講得嘞，梗係咬幾件就去玩啦。兩旁還有很多手作檔攤，賣手繩的、DIY水燈和乾花香包，五花八門。血月不等人，玩下玩下冇咗件事，錯過咗全蝕一刻。算，主角唔係你。再向前進發，有舞台表演，有人穿梭打鼓，更吸引是燭火處處的景象，大家都可以點支燭許個願。然後連串煙花啪啪啪啪在彩燈大樹旁爆發，一時火樹銀花，餵飽滿場手機鏡頭。再向湖邊走去，入正題：放水燈！每人都可以憑券取燈，工作人員會替你點亮中間的蠟燭，還有一支小煙花。跟著就排隊用棍狀工具將水燈放進湖中，讓水燈隨水漂去。壓軸重頭戲，遊人魚貫進入天燈會場，按劃位就座，每張椅的椅背都掛有兩個天燈，會場正中央是一個亮麗的佛塔。節目由打鼓表演揭開序幕，然後是傳統蘭納舞蹈，跟著是僧人念經祈福。緊接下來，萬眾期待的時刻終於來臨，工作人員將豎在每張椅旁邊的火種點著，大家都急不及待取出天燈張開，利用火種點燃天燈。當主持人十秒倒數完結，大家陸逐將天燈釋放，無數天燈同時升上夜空，蔚為奇觀。整晚焦點就係呢個moment，當然要瘋狂打卡！放天燈其實一點不易，一個人放就更難，最好兩人合作。點燃之後，大家都很有耐性等熱空氣積聚，無奈揸實兩三分鐘都仲未有上升動力（主持人話數十聲就放得，呃人嘅），相信和物料太薄有關，稍為弄穿一個小洞就會洩氣。勉強放手的話，天燈會掉在地上燃燒。後記：漫天燈火的浪漫景象背後其實相當危險，很多人都未能將天燈放上天，場內處處都是燒著的天燈，有的更勾著膠椅子燃燒，周圍不時傳出尖叫聲。而場內的人非常密集，我們剛開始點燃的時候，後面那位人兄就最先「放燈變放火」，在我們背後弄出及腰的火舌。又有不少天燈喺心口高度平飛向人群，險象環生。會場中央那座佛塔（雖然是臨時搭建的）結果焫著咗，不消一會就燒通頂，在這夜這猛火像燎原，瞬息之間葬身於這巨變。Touch wood，佛祖保祐，無人受傷，大家盡興而返。港婦漂流： http://www.chiangmaidrifter.net https://www.facebook.com/kennis.chiangmai https://www.youtube.com/@kennis.chiangmai Ig: @kennis.chiangmai #水燈節 #天燈節 #泰國旅遊 #清邁旅遊 #萬人放天燈 #清邁水燈節 #清邁天燈節 #Yi Peng Festival #泰國七大奇蹟 #清邁必玩 #佛教節日 #蘭納文化 #蘭納食品 #CAD Cultural Center Lanna Ethnicity #泰國節日 #清邁節日 (此文章由U Blog 同步發佈至社群)...更多