尖沙咀新居酒屋開業勁抵食

見到呢間新開冇耐嘅居酒屋做緊開業優惠睇落都幾抵食，決定入去探一探店。優惠二選一，1.單點全單免加一85折再每人送日本長崎小長井生蠔 1 隻同Sappore生啤(300ml) 1 杯又或者2.食佢哋嘅限定激安套餐。因為唔想諗就叫咗佢哋嘅兩款開業限定套餐。兩款套餐都係限量供應，想食就最好預訂先喇。 廚師發辦 十六品套餐 ($498/位) 我揀咗呢款廚師發辦套餐，除咗生蠔、3款刺身、6款壽司，仲有沙律、天婦羅、煮物、吸物、烏冬同甜品。 -生蠔都好大隻，亦都夠新鮮，口感偏向清爽而且非常滑溜，食落有淡淡海水味。 -刺身3品：今日就食到煙燻鰹魚、帆立貝拼赤貝同白身魚海膽卷。鰹魚刺身煙燻過之後一d都唔腥，口感實淨。帆立貝同赤貝都好新鮮爽嫩。至於海膽卷就用咗鮮甜嘅白身魚卷住creamy海膽，鮮味十足。 -天婦羅：同樣係紫蘇葉海膽卷同青椒。 -壽司6品：6件壽司選料高質，分別係海膽三文魚子、左口魚邊、白蝦、油甘魚、鯛魚同中拖羅。其中左口魚邊油脂超豐富，白蝦鮮甜味美之餘仲用咗柚子調味增添一份清新感，拖羅入口即融仲帶香濃魚香。 -汁煮油甘魚鮫：油甘魚鮫同蘿蔔都寫到好腍身入哂味。 -鯛魚清湯：魚湯好清甜，飲落暖笠笠。 -冷面汁烏冬：最後仲有個烏冬，用冷面汁炮製，冰涼可口，烏冬口感超煙靭。 由於朋友都想食生蠔，我哋另外再叫多咗兩隻，一樣係咁爽甜鮮味。 爐端燒 十二品套餐 ($398/位) 朋友就叫咗呢款爐端燒套餐，主打嘅其實係8款串燒，另外仲有沙律、天婦羅、茶漬飯同甜品，份量方面足夠飽。 -串燒8品：除咗肉類亦有蔬菜，可以平衡返唔會太膩，今日就食到青椒、秋葵、香菇、豬腩肉、雞軟骨、雞腿肉、牛小排同白鱔。個人覺得牛小排同白鱔最好食，牛小排夠腍身又juicy，白鱔皮脆肉彈之餘仲好夠油香。串燒本身已經有調味，而且撒滿鰹魚碎，食落好香好惹味。 餐廳另外再提供咗鹽、岩鹽、辣醬、檸檬汁4款調味料，令到味道層次更加豐富。 -天婦羅：兩款天婦羅分別係紫蘇葉海膽卷同青椒，炸粉唔厚，入口仲係脆卜卜，夠香口。由其係個紫蘇葉海膽卷，外脆內軟，點少少岩鹽食仲可以帶出海膽嘅鮮味。 -明太子茶漬飯：熱辣辣嘅茶湯，粒粒分明嘅米飯，加上鹹辣明太子同攻鼻wasabi，確實係唔錯嘅配搭。 兩款套餐都有跟甜品，今日就係抹茶雪糕，雪糕軟滑，抹茶味都夠香濃。 黎得居酒屋就當然唔少得叫返杯生啤邊飲邊食喇。