【油尖旺區】【Lemna】終於有得做義工，幾早起身都要出席，不但可以為香港海洋保育作出貢獻，而且有三位美女義工相伴工作，何其快哉。做完義工，首領葉先生話要請食飯，我就喺半推半就、欲拒還迎嘅情況之下勉為其難咁出席咗，佢請吖嘛。
咁有人提議去牧羊少年，當然唔係我闔埋眼都會諗起嘅將軍澳香港單車館分店啦，而係喺文化中心嘅「牧羊少年與他的浮萍」，同女仔食呢啲文青嘢都係適合嘅。恰巧店員亦都安排到一個河邊位畀我哋，緩緩咁流淌住浪漫。
我哋一行四人，各叫一個 $158 嘅「Lunch Set」然後再 share 食，咁就唔分邊個打邊個喇，反正四份大家都有機會食到。套餐有前菜、主菜、飲品各一款，亦都可以加錢以換取貴啲嘅食物或者多一項食物呀甜品呀之類，係咁。
前菜三款裡面我哋要咗兩款，「挪威煙三文魚配溫泉蛋及香草油」幾做到開胃作用，個油幾順滑，溫泉蛋又夠香，唔錯。另外仲有「本日餐湯」，係南瓜湯嚟，但朋友話普通正常無特別，無死鹹係佢優點但其實冇咩嘢好提及。
主菜方面，加 $58 要嘅「燒美國牛側腹配龍萵荷蘭汁烤新薯及澳洲西蘭花苗」生熟度 okay 略嫌肉質稍靭，配菜西蘭花苗幾好食。而「獨子蒜蕃茄蓉意大利辣腸肉醬扁意粉」有啲辣同濃味，加上本身我唔多好蕃茄味，係失望嘅。
另外嘅「菠菜苗蘑菇南瓜蓉燴巴馬臣芝士意大利飯」幾好食，濃而不膩又易入口。最後係碟「明太子奶油龍萵大蝦扁意粉」，白汁嘅奶油味重，但係就爭啲明太子味，少少辣度都冇，隻蝦夠爽口之下，會係白汁控嘅選擇嚟。
加 $58 要咗四隻「蒜香法國雞翼配紐奧良風味蛋黃醬」，正常，冇乜特別，個醬都唔算出眾所以幫唔到幾多。反而我杯飲品，凍「黃金蕎麥茶」有驚喜，蕎麥味好香，比平時飲伊藤園嗰啲玄米茶佢少咗啲熱氣 feel，清清哋。
朋友嘅凍「白桃烏龍茶」同凍「檸檬特調」嚟講，後者有朋友話難飲所以我試咗啖，係新鮮檸檬汁溝 lemonade 嘅感覺，好清新，但飲唔慣係會唔中意。夾埋 $748，加埋一就 $823，每位 $205.75，理得佢吖，又唔使我出錢。。。
（地址：尖沙咀梳士巴利道10號香港文化中心地下）
#1amfoodie #foodie #1am0889 #1ambackup
