【葵青區】【金源】

【葵青區】【金源】呢排寫得比較少葵青區嘅食肆，因為不論係「葵」抑或「青」，我都係比較少經過嘅。適逢呢排都走入青衣睇波，順便處理吓呢頭啲食肆。然而，喺青衣運動場附近嘅餐廳，好似適合寫嘅都已經寫晒，唔係吓吓入青衣城食吖嘛。 行遠少少去到青衣邨嘅青衣商場睇睇，有少少估唔到佢個名咁有代表性，但係其實只係一個蚊型商場。餐廳食肆方面，我諗住行上平台搵啦，點知原來冇架喎，係要走返落地下嗰堆度揀，一眼睇晒就係咁多，食就食咁樣喎。 咁我見呢間「金源」有位，就入去叫個下午茶食吓，我要 $38 嘅「迷你豬漢堡」。佢寫話係「自家手打豬柳+碎蛋」，我以為係兩者夾埋一個包，點知係兩者各一件迷你漢堡。好彩味道都唔差，個豬柳又真係有啲特別嘅。 而配菜方面，除咗薯條同沙律呢啲之外，仲可以揀「薯蓉」，咁我就揀佢啦。佢係凍上嘅，因此食落都係好似食緊沙律咁。嘢飲我要「熱奶茶」，熱飲唔使加錢嘛，吖佢又幾鬼好飲，奶味同茶味都夠濃，飲完仲想嗒多杯喎。 叫多個下午茶，都係 $38 嘅「黑松露芝士炒蛋配厚多士」，個蛋略嫌淡味咗啲，多士就算正常。哈，我再飲多杯「熱奶茶」，都係冇落糖，都係咁正。夾埋 $76，影咗張單之後唔見咗張相，痴線，好彩之前都叫影過一份餐嗰張。。。 （地址：青衣楓樹窩路10號青衣商場地下S8號舖） #1amfoodie#foodie#hkfoodie#thatfoodiething#hkfood#food#delicious#foodies#tasty#globaleats#tastyfood#dessert#foodpics#followforfollowback#love#eat#1am葵青區#青衣#金源#茶餐廳#迷你豬漢堡#自家手打豬柳#碎蛋#熱奶茶#下午茶#黑松露芝士炒蛋配厚多士#黑松露芝士炒蛋#厚多士#1am0848#1ambackup