差啲返唔到宿舍的即興旅程!?🚉 ---《下一站...Spain🇪🇸》· Day 7 到訪拉科魯尼亞

星期六大學冇堂要上。食完早餐決定即興去一轉海邊城市 ---- A Coruña 拉科魯尼亞。 由santiago de compostela 火車站出發，車程大概30 分鐘，來回票價£13.72。 本身諗住到咗A Coruña 先至再買多支水，點知無為意今日係公眾假期（因為尋日係San Juna Night），基本上所有舖頭都冇開，超級市場都唔例外，不過好彩沿路俾我見到自動販賣機，唯有喺度買支水。（今日真係超級熱🥵 成個下晝都30°C）  第一站當然要去沙灘睇吓先，沿路都有好多幾靚嘅建築物。 其中有一啲建築仲有少少香港嘅感覺🇭🇰。 到咗沙灘囉～ 除咗靚同好靚之外，我真係唔識得形容。老實講，我從來未見過咁清咁藍嘅海。 題外話，海灘對出就係北大西洋，可能因為咁樣嘅原因，所以海水特別藍。 第二站📍 María Pita Square 呢個景點係 A Coruña 其中一個比較出名嘅景點，所以喺到達María Pita Square嘅必經之路都有唔少小販。另外呢個城市其實充滿咗好多細景點，如果出發之前有做功課，我諗會有趣好多。（講明即興，我當然冇做功課） 行緊去嘅途中仲比我遇到樂隊表演，🇪🇸西班牙人嘅生活態度就係13:00已經喺bar開緊party🤣。 午餐又係 Burger King（€11.76） ，嚟咗一個星期，已經食咗三餐，我估可能真係要裝返個app 儲分🤣🤣🤣。不過Oreo 雪糕係幾好味嘅。 食完午餐之後，出發前往 ----📍Campo da Rata 呢個地方其實係1936年7月加利西亞軍事起義取得勝利後，叛軍用作處決被監禁者、共和黨人、工會會員和左派的射擊營，但係撇除歷史嘅殘酷，呢個地方真係好舒服。 只係相差30秒路程嘅距離，就會到達今日尾二嘅景點----📍Menhirs for Peace 相入面12個雕像係由加利西亞藝術家Manolo Paz於1994年創作的。 再行多大約30分鐘，就到達今日最後一個景點，亦係我最鍾意嘅景點 ----📍Torre de Hércules 喺觀景台望出去嘅景色，加上海風吹埋嚟，真係一流。唯一可惜嘅係冇帶腳架，冇得打張靚卡🥲（呢個就係獨遊嘅唔好處～～只能怪我唔記得帶腳架) 因為沿途都有影相拍片，去埋最後一個景點之後，手機已經剩返10%電量。本身以為可以撐到上火車，點知火車站都未到已經開唔到機。悲劇就從此開始，首先就係行到一半冇得用Google Maps唔知點行去火車站，沿路又冇路牌指示，加上我出發嗰條路，同我返去火車站條路唔同（我唔係沿路折返），所以靠僅餘對Google Maps嘅記憶&抱住行咗先嘅心態去行，好好彩地最後成功到達。但係到咗火車站之後另一個大問題又出現，因為我張火車飛係電子版本，要開手機app先可以scan QR code入閘，我第一時間已經去ticket machine 睇吓可唔可以靠張銀行卡拎飛（因為英國係可以咁樣做嘅），結果係唔得；然後我再去票務處問職員可唔可以幫我print張飛，但係我估因為我係用 trainline 買火車飛，佢哋check唔到我買咗飛，結果都係唔得；然後個職員叫我試吓去Cafe問有冇得借叉電，因為啱啱幫襯完，所以Cafe職員都認得我，同佢講完我嘅情況之後，佢話可以俾我叉電，但係要我買充電線，我當刻都諗住冇所謂買就買，點知想買都冇得買🤦🏻‍♂️（佢哋冇 iPhone 線...），然後個職員就建議我去問其他火車站嘅人，個下講真真係幾驚。不過唔想冇得返歸，唯有鼓起勇氣去問人，見到個貌似識講英文，就行埋去問有冇叉電器可以借俾我，好好彩地佢識講英文，亦都有叉電器，危機總算解決咗🤧🤧。 同場加映：西班牙泳池🏊🏼🇪🇸 有樣嘢覺得幾得意嘅就係，點解沙灘同游泳池會出現喺同一個地方🤣🤣 Day 7 完。✍️ Instagram: _ooahlongtea YouTube: ahlong’s vlog #旅行 #西班牙 #旅遊 #歐洲 #行程 #獨遊 #vlog #blog (此文章由U Blog 同步發佈至社群)