2025/02/19

睇落小奇怪，食落好和諧

有小朋友唔鍾意食太貴嘅餐，所以我今次要搵一間經濟啲，但一樣好坐嘅舖頭食飯。原來呢個商場已經換左好多舖頭，不過呢間開左咁耐，原來佢食過好多次，食到做埋VIP，今次叫左佢鍾意嘅選擇，同埋試左新甜品。魯肉汁肉燥蔬菜 $16→14.4 蔬菜有椰菜同西蘭花，比一般嘅台式#燙青菜豐富。椰菜本身有薑味，西蘭花爽口，加埋好多滷汁嘅肉燥，感覺好有層次，呢款好開胃。熔岩蛋之戀 (拉絲芝士火腿蛋餅) $45→40.5 小朋友無介紹錯，蛋餅真係可以拉絲，同埋塊火腿片算幾厚，的確好邪惡。芒果魯肉粉絲、走蔥 $60→54 根據以往經驗，生果配肉，一係好得，一係好伏，結果竟然真係睇落小奇怪，食落好和諧。呢度嘅魯肉，唔係絞碎嘅肉燥，而係南部口味，用腩肉切碎嘅滷肉，所以真係會比較肥膩，芒果嘅香甜，竟然平衡到呢樣嘢。本身係芒果魯肉飯，不過小朋友唔鍾意食飯，所以我地將飯，免費轉成粉絲，粉絲一樣好滑，不過因為成條，結果無得同芒果魯肉一齊食，感覺都係爭啲。雖然我地唔係要控糖/減肥，但下次都係+$3，轉做豆腐底，可以用匙羹舀，應該會似食飯嘅感覺！台北夜市小食拼盤 ( 台灣腸、花枝丸、鹽酥雞）$45→40.5 將三款台灣小食炸香，花枝丸同鹽酥雞都炸得香脆，台灣腸都係炸嘅，好食但唔驚喜。仙草豆奶大 - 走冰 $19→17.1 豆奶好香甜，仙草係完整一大塊，建議撕開封口大啖咬。爆珠馬蹄椰子水 $36→32.4 少甜、少冰平時去台式小食，都係飲珍珠奶茶，呢種比較甜膩嘅選擇，原來要清新都唔一定只可以飲純茶。椰子水本身就係清爽嘅代表，提供口感嘅爆珠，真係有爽脆嘅馬蹄肉，再加埋浸住一塊葉，飲完個胃會好舒服。鮮果斑斕河 $35→31.5 呢款係新甜品，材料芒果、草莓，斑斕味嘅爽滑河粉，浸住菊花糖水底。芒果香甜，士多啤梨酸爽，浸住菊花水非常平衡。甜品嘅腸粉，都係椰子味，有啲爽滑感覺，今次加埋鮮斑斕製作，味道同顏色嘅層次會更多，更吸引。總數 :256 下午茶/晚市 9折：$230.4 電話: 53697868 #台灣菜 #台灣美食 #台灣 #打卡美食 #九龍美食 ...更多