隨心地說走就走 👣---《下一站...Spain🇪🇸》· Day 10 & 11

今次個Blog 由 Day 10 (27/6) 嘅晚餐開始，因為所有活動都已經八八九九，重覆嘅事就唔多作紀錄了。晚餐返咗去Asian street food 間餐廳度食，入到去老闆娘同待應都已經認得我😂，今次叫咗個牛肉拉麵（都係嗰句其實佢係烏冬）同埋一份豬肉餃子，依然維持到水準！埋單€16.6。 不過唔知點解今次餐廳冇開冷氣，入到去真係太熱🥵。 食完晚餐準備返宿舍嘅時候，經過公園必經之路，突然聽到有一班人大嗌我個英文名，原來係美國班朋友咁啱都喺公園度。之後就係咁，我哋就一齊喺條街度踢個「沙波」，玩法其實同踢毽一樣，但係我唔知個波exactly叫咩名，不過類似豆袋但係球體形狀。 同場加映，返宿舍前見到嘅日落🌅。 Day 10 完。✍️ Day 11 ，落堂第一樣要做嘅事就係寄post card。因為前日已經喺郵局買定郵票，所以今日可以直接去郵筒寄。 落堂之後因為冇活動，所以喺Google Maps搵吓附近有乜景點未去過，俾我搵到個山頂嘅位置 —— Espellos ，可以望到城市全景，於是就決定出發。沿路經過嘅建築，真係好似返咗大陸。 到達Espellos 之前， 會經過一個西班牙嘅文化中心 —— Cidade da Cultura de Galicia (Santiago de Compostela)。 打卡城市全景 & 冬甩📸～～ 喺山頂位置逗留咗大概大半個鐘左右。都到咗晚飯時間，見到附近有間商場，諗住喺嗰度搵嘢食，點知商場嘅食肆超級少，仲要全部都唔吸引🫠。所以唯有行多10分鐘路程，去返上次睇電影嗰間商場食晚餐。 是日晚餐 VIPS smart。叫咗一個漢堡包套餐（€16.2），正常商場餐廳價格，不過講真唔係好化算，但係我費事再喺條街度搵～～懶惰的我😤，所以就求其啦。不過其實落完單之後發生咗少少插曲，食物上枱之後發現個漢堡包嘅漢堡根本未熟，於是問個侍應可唔可以換一個俾我，喺我指手畫腳&用盡能力講英文嘅情況底下，最後換咗一個新嘅漢堡（其實嗰侍應都好好服務態度，第二份漢堡上枱之後，佢仲特登過嚟問我得唔得，呢個位真係要俾個讚👍🏻） 返宿舍嘅路程又係有好靚嘅日落。🌇 總結，旅程去到Day 11，已經遠遠超越我對今次旅程嘅期望，剩低三日就要離開西班牙，已經開始覺得唔捨得，特別係呢個旅程認識嘅所有人。 Day 11 完。✍️ Instagram: _ooahlongtea YouTube: ahlong’s vlog #旅行 #西班牙 #旅遊 #歐洲 #行程 #獨遊 #vlog #blog (此文章由U Blog 同步發佈至社群)