老婆大人好鍾意食拉麵我當然奉陪到底！呢日去咗中環立體派食晚餐因為有期間限定拉麵新上場。
老婆大人上次食過話好正所以知道有新拉麵即刻捉我食。
呢日熱到傻整支黑啤嘆吓先！呢支Coedo Shikkoku黑啤口感好輕味道幾醇唔錯喎。
睇睇餐牌見到有三款新嘅拉麵，老婆大人全部都想試咁就叫晒佢最多我食多啲囉。
呢日仲見到嚟自日本嘅冠軍給拉麵大師林隆臣，可以食到佢親手煮嘅拉麵我哋咁鬼好彩嘅。
三款拉麵我哋都叫晒嚟試第一碗嚟到嘅係火炙豚肉担担沾麵，見到三大塊火炙豚肉好鬼吸引加埋個紅卜卜嘅沾汁感覺好惹味。
呢個炙燒豚肉係薄切嘅！肥瘦各半食落口唔會覺得好油膩但就好甘香，同平時食厚切嘅叉燒感覺好唔同。
呢個紅噹噹嘅沾麵汁除咗有白雞湯仲加咗芝麻醬同埋辣椒油，食落去有香又有辣啱晒我老婆大人嘅口味，最後記得加個豆乳湯落去飲埋個湯呀。
雖然我怕辣但係食咗一啖都可以接受，我特別鍾意佢個粗麵因為好有彈性咬口十足。
跟住呢碗雞醬油拉麵個樣靚仔到不得了！呢度一碗入面有三款唔同嘅雞叉燒，乜嘢口感都食得到啱晒貪心嘅我。
呢個湯底好特別除咗係雞醬油之外佢仲加咗啲貝殼鮮味喺入面，同平時食開嘅雞醬油拉麵味道分別好大！可以一次過食到肉同埋海鮮嘅甜味真係好唔錯。
呢碗麵入面有一隻赤心蛋紅噹噹嘅顏色好搶眼，而且食落好入味係正蛋一隻。
三款雞叉燒都好正不過我就覺得呢件阿波尾雞胸口感最得意，食落去好嫩滑但又勁有咬口第一次食雞胸有咁嘅感覺唔錯唔錯。
最後呢碗明太子豆乳雞白湯拉麵係貪心嘅老婆大人想食，因為佢見到入面有明太子OK身為老公大人嘅我包底就包底啦。
奶白色嘅湯底睇落勁濃郁一啖飲落去有黏嘴嘅感覺，如果鍾意重口味嘅朋友一定要試呢碗拉麵。
飲完啖湯就將呢個明太子撈入拉麵，加埋入面嘅松露油同岩海藻味道仲會鹹香，不過呢碗拉麵都幾飽肚㗎哈哈。
兩個人隊三碗拉麵真係飽到上心口！返到屋企附近要行返15分鐘消化下先得，呢三款拉麵賣到4月30號㗎咋而且每日限量20碗，想食嘅真係要早啲去排隊喇。
#拉麵
