雖然間唔中都黎呢度開餐，但對於呢個黃金芝士鷄煲 ($208/小)就再度重遇上。
芝士量可以選擇多少，因仲要留肚打邊爐，呢個係普通份量。關蓋煲至芝士熔掉就食得。
估計小份都有半隻鷄份量，每舊都厚肉，一夾起就出現我最期待嘅畫面……….拉絲。芝士嘅咸香包圍住成舊鷄肉，好味又邪惡; 煲內仲有芹菜同洋蔥，增加香味又可以解吓膩度。
每次黎呢度嘅指定動作都係食牛頸脊，要試多D唔同部位，今晚食霜降Prime牛板腱 ($198/小)
脂肪比起牛頸脊少，開初都驚烚完會唔會變成柴皮。切成薄片，烚十零秒就已轉色食得。入口係嫩滑，肉味幾香，下次黎幫襯牛肉類又可以多一個選擇啦……哈哈哈。
呢度嘅丸同菜類可以有半份咁叫，岩晒D三心兩意，有空間可以叫多幾款。就好似呢客手打五寶拼盤 ($63/半份)，分別有鯪魚球/墨魚丸/牛肉丸/蝦丸/豬肉丸，每款一粒，好似五大星球。食過邊款好味嘅就可以再單獨再叫。
推介墨魚丸，烚完都仲咁大粒，口感彈牙，食到墨魚粒，唔係一團粉就算。
仲有鯪魚球，鬆化得黎有點嚼口，鯪魚味幾出。
友人歡喜食魚，專登叫碟脆鯇腩 ($98)比佢。一客6件，唔算太厚切但色澤亮麗，望落幾新鮮咁。
貪腩位有肉得黎只有一條大骨，口感爽脆。
想再飽肚D?! 咁就叫客紅薯粉 ($22)
芝士湯底遇上紅薯粉，入口滑嘟嘟，獨有煙韌口感仍在，食完都幾滿足。
今晚呢餐邪惡度爆燈，明天要做返多少少運動先得啦……………哇哈哈。
#ublog #foodblog #hotpot #cheese #chicken #runningchicken #foodpics
#hotpot #chicken #cheese #foodblog #foodpics #ublog #runningchicken
(此文章由U Blog 同步發佈至社群)
