賞味香港 - 九龍城食泰菜 泰象館

九龍城對於長沙灣街坊的Koala來說，真係又愛又恨，其位置比起在下工作了21個月的「葵涌百慕達三角」更為隔涉，雖則有巴士去到九龍城外圍，可惜班次疏落，令時間難以控制，最快捷方法可以話係小巴，可以深入九龍城內圍的衙前圍道，但是車資卻是巴士的兩倍，至於年前通車的港鐵，7個站要轉兩次車，搭車都要打醒十二分精神唔好玩手機，免得坐過站遊車河。 自從去年(2022年)10月展開「40歲後留港Study Holiday」，平日都比較忙碌，除了返工放工再返工同返學，加上天氣反覆無常，近月夜左訓又晏左起身，玩樂同鍛鍊身體既時間真係減少左好多，相反Weekend比較得閒，假如不用閉關做功課，間中都會相約朋友外出走走。 對於一個新進斜槓中年的後疫情生活，擁有著有限度的規律和自由，是過去前所未有的，生活上的轉變令到很多事情都被改變，令在下再次調節自己。假期外出用膳，揀一些較少人流的區域，到九龍城食泰菜是個不錯之選，自從屯馬線年前通車，打開了東九龍南部之門，港鐵宋皇臺站B2出口可直達九龍城，泰國餐廳除了位於B2出口對面的隆姐，呢期我就移師到城南道既泰象館。 為左答謝Koalascities(^O^)!呢兩年Logo既創作人兼前同事Aimee姐，星期日午餐選址在城南道上的泰象館，柚子沙律、燒豬頸肉和香葉雞肉飯都係由前同事發辦 呢度個柚子沙律用料豐富，仲有好多隻蝦，味道好好我喜歡！ Aimee姐指定要點既燒猪頸肉，肉質香口爽滑，旁邊個泰式辣醬係靈魂呀~ 幾年前與友人在九龍城試過這炸皮蛋球(蝦膠包住皮蛋)後，可謂一試愛上，之後每次在泰國餐廳的Menu看見此菜式時，都會點上 喜歡香葉肉碎飯那種入口「熱辣辣」的感覺，食店提供豬/牛/雞的選擇，今次就試左雞，食這個飯個人認為最緊要個肉碎炒得惹味，個飯要夠熱 點左個Side Dish蒜蓉包，個包烤得脆卜卜好好食，但由於用餐當日天氣寒冷，食物上權後好快就放涼 友人是澱粉質人，為左個薄餅，就揀左個唔係咁辣既椰汁咖哩雞肉配黎食，飲品就點左杯芒果沙冰 食咖喱緊係要Order番個薄餅陪襯啦 先後兩度光顧，都是在Weekend，星期六的晚市，比起星期日的午市繁忙，二人前晚餐放滿檯，沙爹串燒都是水準之作 以往去九龍城食飯都係跟朋友去，食過邊間佢都健唔健在，我真係冇乜印象，直至近年多左係呢區活動同開餐，先開始慢慢深入了解，位於城南道既泰象館，門面光猛，店內都是茶餐廳格局，算是坐得舒服 泰象館泰國餐廳 地址：九龍城城南道48號地鋪 伸延閱讀 賞味香港 - 長沙灣的泰國味道 泰道 賞味香港 - Mango Tree Kitchen的泰式下午茶 賞味香港 - 葵涌隱世小店 亞潘泰國菜 #九龍城 #泰國菜 #柚子沙律 #芒果沙冰 #賞味香港 #泰象館 #炸皮蛋球 #40歲後留港Study Holiday #宋皇臺B2出口 #泰象館泰國餐廳 #香葉肉碎飯 #沙爹串燒 #燒猪頸肉 (此文章由U Blog 同步發佈至社群)