2024/06/04

【祥仔（尖沙咀）】｜質素一般貴價茶餐廳

Family gathering 節目係睇戲，諗住一齊食個 lunch 先睇，家姐揀咗呢間打住電視煮食節目嘅廚師（我實在唔會形容為名廚）開嘅港式茶餐廳。其實之前有諗過想試佢嘅四川菜，但一直都未有機會，跟住原來已經摺晒～本身想叫招牌 No.1 鴛鴦叉燒煎蛋飯，點知下晝1點已經賣晒，莫非要11點嚟先有得食？😂 🍴脆脆豬扒飯（$138）其實唔係好想食炸嘢，不過叫唔到個叉燒飯，跟住已經唔知叫咩好，就叫呢個。個豬扒幾大塊又真係有1吋厚嘅，炸得好脆，唔夠 juicy 但未算好乾，有一片燒過嘅菠蘿，個醬汁都 okay 不過份量比較少，令到食成個飯嘅時候都乾乾哋～ 🍴牛柳粒意粉 • 黑椒汁（$158）呢個係用咗美國安格斯牛柳粒，幾入味，個黑椒汁okay 未感受到太特別，整體上正常。 🍴重量級全日套餐（$148）呢個 all day breakfast 可以揀豬扒、雞扒或吉列魚柳，因為唔想再吉列又唔想揀雞扒，唯有又係揀豬扒。嚟到 presentation 係靚嘅，不過塊豬扒比茶餐廳更流，少少硬又少少嚡😅炒蛋唔太滑，水耕沙律菜都幾新鮮，司華力腸、大啡菇、牛油果、多士都唔會錯得去邊，整體上係一般。 🍴兩日兩夜羅宋湯（+$3）味道夠濃郁，都幾多料，值得加$3 將餐湯改成呢個！ 🍴港式奶茶屋企人飲嘅，劣評如潮，已經叫咗多奶都救唔到杯茶，我試咗一啖，果然係又嚡又澀好難飲，個茶底非常出事，唔記得影相～ 🍴熱滴漏咖啡知道佢嘅茶底出事，都係唔好叫茶嘅飲品，就叫咖啡飲，都係難飲，咖啡豆唔掂，只係相對比奶茶好少少。整體上食物質素一般過一般，我估佢嘅定位係中價港式餐廳？但價錢貴過茶餐廳一倍，食物份量係大嘅，尤其係飯量，當然地段商場租金的確係成本高，環境係乾淨坐得舒服，然而價錢唔平，又唔算好食，我自己就未必會再嚟食啦～體驗感受 ⭐️⭐️⭐️ 🔍祥仔（尖沙咀），香港追蹤我的IG：tracyloveliving #K11 #茶餐廳 #尖沙咀K11 #K11 art mall (此文章由U Blog 同步發佈至社群)...更多