2024/08/14

淺草百年老店鰻魚飯&壽喜燒

呢排睇新聞見好多人去日本賞櫻，行李都要等5個鐘，真係好誇張，大家都有幾掛住鄉下我真係明嘅，因為我上年12月都去咗一轉東京，發生咗好多事，因為嗰時嘅出發前又要download APP，返香港又唔記得要健康申報，行李又超重要罰錢，係機場個人急到傻，攪到差啲機都上唔到，最後空姐仲要陪我哋一齊跑，真係好難忘嘅經歷。返到香港無心情無心機寫文，我就係咁情緒化haha 咁多人去日本，係時候蹭吓流量喇！雖然上次嘅東京遊我自己覺得唔太順利，但真係要公開表揚一下，日本航空JAL嘅服務真係超好，去程時由於遲咗買機票（因為而家有部分係一買就劃埋位）同行嘅人士唔能夠坐埋一齊，入到登機閘口收到電話話盡量安排我哋一齊坐，去咗咁多次旅行都未試過咁（可能我出國經驗太少），最後我哋可以一齊坐，之後返程因為唔記得要健康申報，喺最後一刻空姐擔心我哋上唔到機仲帶我哋行機師空姐平時行嘅通道，仲要一齊跑，我無咩可以送俾空姐我只係夠錢（因為都使晒啲yen啦）買支寶礦力俾佢，跑完都想佢補充吓體力，真係太感激，我甚至唔知佢叫咩名，真心無人俾錢我寫好JAL！廢話好似講太多，都係入返正題先。去日本食嘢真係最重要嘅行程沒有之一，因為日本真係好多好嘢食！淺草係旅遊區，身為旅客一定要去，我就係如此膚淺haha，唔要咩深度遊，一定要去人多嘅地方！淺草之所以多人，因為真係超多嘢食，你想食壽司、居酒屋、燒肉、壽喜燒、天婦羅、烏冬、拉麵⋯⋯ 真係應有盡有，所以次次想book淺草嘅酒店都book唔到，真係東京好熱門嘅觀光地方。話說我媽話要食鰻魚，因為我就對鰻魚無咩特別感覺次次同佢去都無話同佢食，但因為母親大人話今次一定要食嘅小人一定為佢鞠躬盡瘁！上網一搵，呢間二百多年歷史老店嘅鰻魚飯已經係勁多人介紹過，居然未食過係正常都話我對鰻魚無咩特別感覺，但點解會推介真係有原因，就係我呢個對鰻魚無咩特別感覺嘅人都覺得好食，點都值得推介一下喇！鰻駒形前川位於 Skytree附近，其實唔近只係望到Skytree，最近係淺草站A2a出口附近，都幾易搵到！其實東京咁多食鰻魚嘅地方，點解會最後去呢間，主要嘅原因係我覺得佢就算唔好食我都可以影吓相，有Skytree喎同埋榻榻米和室喎，睇吓我對鰻魚幾咁無興趣haha 榻榻米和室已經好多日系Feel，坐底點菜仲要全日文無圖，我都係上網睇相之後點㗎咋。當然一定要點鰻魚飯啦，鰻魚玉子燒、白鰻魚都好值得一試！創始人係從一家淡水魚批發商轉型為鰻魚餐廳，所以食材方面一定係新鮮。唔想食咁多飯，鰻魚可以單點。白鰻魚係相對比較小地方有，原因係鰻魚要夠新鮮先可以做白鰻魚，品賞食材嘅原味。呢個螺一定要食，好鮮美，又唔老仲有酒香，我唔知佢叫咩名，因為菜單日文唔識睇，都係睇圖點㗎咋。甜品都靚過人，有富士山係入面。餐廳靠窗位置見到Skytree，風景真美！好食嘅嘢真係好難用文字形容，詞窮嘅我剩係識講好味haha 走嘅時候仲可以係門前影吓相，日式街拍嘅feel，行返出街口仲有得影吓 Skytree！鰻駒形前川地址：東京都檯東區駒形2-1-29 疫情前去得最多就係日本，又唔使簽證飛幾個鐘就到，今次寫呢篇文睇返好多舊相，2018年自己去東京嘅時候原來去過間又係百年老店嘅壽喜燒，當時又係唔知做咩無寫文介紹，而家啱啦都係淺草順便介紹埋！壽喜燒老店米久本店又係超多人係網上推介，百年老店榻榻米仲有日式園景，餐廳環境真係好靚！店舖用嘅和牛係近江牛，以壽喜燒嘅價格算平嘅選擇。呢間店其實一個人去都OK，一人一爐咁樣樣，幾千円就可以攪掂。點一份已經有晒和牛、豆腐、蔬菜、雞蛋、白飯，唔識煮嘢都唔驚，店家會幫你煮好，等你慢慢享用。由於啲相年代久遠，所以畫質係差啲，但啲嘢係好食㗎。呢間店附近行吓又係可以見到 Skytree，又可以影吓日系街拍。壽喜燒老店米久本店地址：東京都檯東區淺草2-17-10 最後同場加映，呢間連google都搵唔到嘅店，點解會搵到係因為當年又係疫情前2020年去嘅時候，著和服去淺草寺影相，著晒和服又唔行得遠是但入一間舖食嘅，但由於呢間店門口排晒隊先吸引到我入去。上州和牛専門店ぐんま育ち其實喺Tabelog & TripAdvisor 都有介紹，有好多間分店㗎，其實呢間嘢都幾多嘢食，可以同時燒肉及壽喜燒，雖然佢唔係啲咩百年老店，對我嚟講都算有記憶點，因為接待我哋嘅人見我哋著晒和服咁一定係遊客，所以俾咗個包廂我哋坐，真係非常貼心。呢間店顧名思義就係用上州和牛，從農場直接採購A級黑毛和牛，價錢都係幾千円內攪掂。點套餐有晒前菜、沙律、麵豉湯、飯，可以壽喜燒&燒肉兩者兼備，啱晒港人可以share大家一齊食，可以滿足到兩個願望。著和服喺包廂影相的確係值得留念！上州和牛専門店ぐんま育ち地址：東京都台東区浅草 1-34-4 ↓愛去旅行嘅我仲有推介過京都及大阪米芝蓮餐廳，有興趣去睇睇↓ 京都米芝蓮三星懐石料理 https://blog.ulifestyle.com.hk/article/natalieluvbeauty/3586926/京都米芝蓮三星懐石料理大阪米芝蓮百年老店壽喜燒 https://blog.ulifestyle.com.hk/article/natalieluvbeauty/3551493/大阪米芝蓮百年老店壽喜燒 ☆Facebook☆ ★instagram★ Natalie ★instagram★ ☆Facebook☆ Blog ☆Beauty Exchange☆ ★She.com★ ☆U Blog☆ ★Blogspot★ for any enquiries pls contact chunatalie4@gmail.com #和牛 #壽喜燒 #鰻魚飯 #燒肉 #百年老店 #淺草壽喜燒 #淺草鰻魚飯 #榻榻米餐廳 #淺草燒肉 #淺草必食 (此文章由U Blog 同步發佈至社群)...更多