【原力工業（網店）】｜網紅白兵出嘅食品掂唔掂？
網紅白兵節目就聽得多，早排開始踩過界推出食品網店，新年前更加有一集係接近食播嘅內容，所有食物都講好食到天上有地下無，用料正到不能抗拒，我就認真科金睇吓佢係吹水唔抹咀定係真材實料！
🍴台灣高硒綠茶（$238）⭐️⭐️⭐️⭐️⭐️
佢有茶包款同埋散裝，我買咗100g散裝。呢款茶由多種台灣茶混合而成，包含凍頂烏龍、文山包種茶、東方美人、松柏長青、三峽龍井、阿里山珠露、台灣高山茶、龍潭龍泉、大禹嶺。根據佢嘅官方網頁資料，係用特別嘅發酵方法，將香味達到極致，清香撲鼻，入口回甘，而且含有極豐富硒元素，有SGS認證，可以迅速被人體吸收，增強免疫力，具消炎作用，加快回復力。
上網睇吓「硒」係咩，原來係土壤中硒嘅含量豐富，出產嘅茶葉有保健功效。白兵有講飲咗喉嚨會好舒服，試咗真係唔錯，連屋企老人家都鍾意。
用佢嘅方式以熱水沖泡，絕對有佢寫嘅效果：
第一泡茶：淺綠色，甘甜，順滑，回甘。
第二泡茶：深綠色，芳香，純厚，回甘。
第三泡茶：淺蠍色，香純，濃厚。回甘。
第三泡茶之後我仲用凍水冷泡埋，仲有微微茶香，呢款出品係好掂👍
🍴三合一禮盒（$218）⭐️⭐️⭐️⭐️
有三款油，包括花椒油、花生油、龍息辣椒油，原價$238，好似因為買咗一款糕減$20。花椒油係綠色，花椒味好香，打邊爐做調味，或者煮辣嘢時熄火後落，都好正！花生油係非常濃郁花生味，真係如白兵所講，好似食緊勁厚花生醬嘅味道，煮嘢用都係要熄火先落。龍息辣椒油就係非常強勁嘅辣味，我食得辣都只可以用滴去落，落多少少就一定會over，呢個都係做得幾好嘅～
至於完全唔掂嘅設計係個樽蓋，設計得太厚實，雖然睇YT知道點開，但實際響廚房操作嘅難度好高（試過嘅一定明我講咩），另外瓶口太大，尤其龍息辣椒油，想倒少少好困難，倒多咗又會太辣。跟住因為係油嘅關係，總有少少留響個邊，要抹得好清爽下次先可以好開少少，因為一有丁丁油又會跣手個蓋就仲難開，亦都好怕會打爛支嘢，試過兩次開到彈走咗個蓋，跟住又要抹油，好彩嘅係個蓋冇爛到或者因為飛脫而整爛其他嘢😑
🍴冷過雞（$208）⭐️⭐️⭐️
呢個用咗清遠走地雞製作，講真係幾抵買，香港嘅嘉x雞仲貴過佢，而且佢仲處理好整埋味，真空包裝，成隻雞連袋放入水煲返熱就食得（btw 屋企要有大煲先放得落，要睇清楚情況），好方便！隻雞嘅胸肉冇佢哋講得咁咁咁滑，其他部分係唔錯，調味係稍微偏淡，雞味係有，都唔錯嘅～
🍴冬菇海參（$68）⭐️⭐️⭐️
冬菇海參係好味，味道帶甜，有一大一細冬菇，但海參係碎濕濕，得一細舊係相對完整夾得起，減咗一粒星係因為海參碎上。可以理解一分錢一分貨，$68唔可以俾咁多料。插曲係收到第一轉貨時，個包裝爛咗，因為食物安全考慮唔可以食，即刻同CS 講，佢好快覆我聽日寄返（嗰時都年廿八啦），當然冇寄，完全明白理解新年後先寄，唔會追啦，開心過年緊要D，都唔好迫人埋牆角～我等到初十都冇聲氣先再追，CS 答我聽日寄出，隔一日就收到，仲有一個凍袋包裝好，都算唔錯！
🍴甘潤馬蹄糕（$138）⭐️⭐️⭐️
呢款可以熱食同凍食，馬蹄如白兵所講非常爽又好清甜，糕嘅味道係幾好，可惜我完全唔鍾意佢嘅 texture，太腍！似硬少少嘅布丁，我會形容為入口用少少力就爛咗，口感上好奇怪，試埋凍食都冇改變到呢個睇法。本身都好奇想試佢嘅蘿蔔糕，但因為屋企已經有，唔會食得切所以冇買，不過睇返YT 某D 蘿蔔糕係因為順豐冷藏太凍而出咗狀況，有興趣想知就自己上返 YT search 啦～
整體上我覺得個茶同埋三款油係可以回購，如果屋企人想食一隻雞時亦都會諗起響呢度再買。希望佢嘅油可以再設計一種易操作嘅樽去裝，始終佢哋出食品都係新手，好多嘢都唔係諗得太細緻，加上佢哋都唔似有太多廚房煮食經驗（雖然我都係新手），使用方便度未必考慮得太周全。
番外篇：
佢哋好有心咁 send 咗問卷調查，2月29號前回覆可以獲得佢哋出品全天然雪糕一杯，我有認真去俾 feedback，的確有收到通知攞（雖然我未攞或未必會因為一杯雪糕山長水遠去），我覺得佢哋都係有 heart 嘅，希望佢哋加油啦！
☆My IG @tracyloveliving ☆
(此文章由U Blog 同步發佈至社群)...更多
