太開心啦,好耐無食放題啦!今日決定俾個胃大解放,好多食評都話呢間性價比高,咁就揀左食呢間。
入到餐廳見到都差不多坐滿人。沿途經過自助區,嘩! 都有幾多選擇,飲品櫃啤酒、汽水、果汁、茶,樣樣齊,仲有自家製冷泡茶;清酒、梅酒都係任飲;沙侓、小食、湯、甜品、雪糕/雪條….. 琳瑯滿目,好吸引。
🍣食放題一定要食刺身! 三文魚就最正,我地好好彩可以食到三文魚腩,夠晒厚身肥美,食落有少少魚脂。
🍣壽司必選海膽山,絕對係回本食物,估唔到放題嘅海膽都咁高質,完全無惺苦味,仲有少少甘甜,壽司飯又唔會大大舊,真係食多幾件都得!
🍤天婦羅有幾特別嘅沖繩苦瓜天婦羅,苦瓜同天婦羅脆漿又幾夾喎,點埋天婦羅汁,帶少少酸味,會更突出苦瓜的鮮味。
🥓炸物無論係榴槤炸彈、吉列牛乳炸鮮奶、紫心香芋丸、芝麻雞翼都有驚喜,無油膱味;榴槤、芋丸、炸鮮奶都很香甜,榴槤炸蛋更有爆漿效果,一口咬落去,d榴槤漿不停漏出嚟,榴槤迷一定會鍾意。
🍢串燒牛舌大大片、翠肉瓜多汁;食過再叫多round嘅嘅係溫室菠蘿,五個字足以形容,又甜又多汁!!
🍖燒物就食左香草燒羊架同蒲燒鰻魚,鰻魚又係肥嘟嘟,好好味,鍾意食鰻魚嘅記住呢個一定要叫。仲有開邊蝦賣相同味道都係必叫之選。
最後飲埋梅酒🍶、食埋雪條🧊,枝咖啡味雪條有好濃嘅咖啡味,尤其係個咖啡脆皮,簡直係好似飲緊咖啡☕一樣。
太多好嘢想食啦,奈何個胃唔爭氣,一定要搵日再食過。呢間放題真係平、靚、正!!⭐⭐⭐⭐⭐