攝影師Coral育嬰日記：Horris 第一次北上，奈爾寶探店

聽聞國內而家多咗好多親子樂園，1歲以下仲未免費入場，Horris 之前已做左回鄉證，於是計劃下一家人北上遊玩。 在這裡可以比個貼士大家，帶BB返大陸，出境除咗要有身份證之外，仲要有回港證或passport, 我哋因為無帶，爭啲就唔比過關，我最後攞左BB 回鄉證出嚟，勉強過到，關員提我，下次記得帶喇！ 我哋屋企近深圳灣口岸，巴士15分鐘就到關口，再乘的士前往，車費37元，到達印力中心，這是一個商場，有得睇嘢有得食嘢，我哋選了間打邊爐，不過國內商場嘅冷氣真係嚴重不足，如非必要，真係唔好揀啲有個爐在枱面嘅餐廳，兩仔爺都食到成頭汗。 之後我哋到左奈尔宝，是日重頭戲，1歲以下、65歲以上免費入場（好似見到孕婦都係免費入場）正價是398人民幣一位，可以帶一個大人，額外大人陪同票是100人民幣。 付款後每人分發一條手帶，聽講可以用手機app 知道家人/兒童位置，避免走失。 進場需要脫鞋，有儲物櫃可以使用，目測環境乾淨，樓底高，設施是有用心設計過的，場景小朋友眾多，老實說好多野都唔啱一歲以下玩，不過有一個房間，專為2歲以下幼兒設計，全場鋪軟墊，有職員守在門口，不讓超齡兒童進入，及會迅速將玩過嘅玩具還原。Horris 在裡面可以盡情爬，亦有滑梯及波波池，還有些感觀探索嘅設施，Horris 最鍾意係照鏡，見到鏡中嘅自己笑，佢又笑得更燦爛，自戀感滿分。 差唔多時間又探訪下育嬰設施，換片的地方設備齊全，連尿片都有免費供應，布幕後有2個位置比媽媽餵母乳，私隱度就不及香港大部分商場的育嬰室，得兩張椅，兩個媽媽你眼望我眼，其他人亦無辦法知道裡面是否有人正在使用。 除遊樂設施，餐廳都佔了很大空間，食物望落都吸引，價錢以國內來說偏貴，以一件蛋糕為例，37蚊人民幣。不過我地食飽先入場，就無再點餐了。 隨著時間越來越晏，人就越來越多，到下午四點左右我們就離開了。 附近有間山姆商店，大型美式超市，需付費做會員才可進去購物，剛好遇到個有心人帶我們進場參觀，Horris 第一次坐在超市的購物車，表示非常興奮，超市貨品又平又大件，連嬰兒車、電器等都有售賣。 購物完，再在商場食個飯，再飲埋杯奈雪之茶就回香港了，有小朋友之後，時間真係過得好快，假期好似永遠都唔夠咁。又係時候諗下下次帶佢去邊度玩喇！ #旅行 #親子活動 #親子 #內地 #探店 # 北上 (此文章由U Blog 同步發佈至社群)