葵涌廣場～足料麻辣燙！
葵涌廣場呢個年輕人聚腳地，好多時都心癢癢想過嚟掃街，而近排麻辣燙喺香港真係大熱，行行下見到喺地下嗰層有間麻辣燙，啱晒我哋呢啲辣魂上身嘅麻辣控！
福記麻辣燙預設咗幾個套餐：四福、六福同八福，食材都特別過人，例如蛋餃、虎皮鵪鶉蛋、小脆肚、骨肉相連、海帶節同千葉豆腐都有，感覺素食者都有好多選擇～麵類就有紅薯粉、土豆粉、米線、公仔麵、粉絲；除咗麻辣湯底，仲可以揀清甜嘅骨湯底，想乾拌嘅亦得！
先叫咗個小辣麻辣湯六福，即係可以揀六款配料，湯底表面浮住一層誘人嘅紅油，配埋成碗芫茜蔥加持，香氣撲鼻直撲嚟！揀咗魚豆腐、藤椒肉片、蟹排、麻辣牛肉，仲有油麥菜同貢菜，啲肉係事先已調味同醃製，肉質口感軟滑，好入味。另外土豆粉滑嘟嘟好有嚼勁 (不過夾嘅時候要小心啲，好容易就滑走) 配上擁有濃烈辣味嘅湯底，口感刺激，令人瞬間上癮！
朋友揀咗骨湯底，個湯係奶白色，睇落都已經好吸引，一啖飲落就感受到濃郁嘅鮮味！配料份量算多～揀咗魚子福袋，大大件有驚喜！白蘿蔔片就清甜爽脆，配埋個骨湯唔錯，加埋茼萵唔會覺得太漏～最特別係佢嘅粉絲，比較粗身，長期浸落湯度都保持到佢嘅彈牙口感，完全唔會軟晒咁～
福記麻辣燙
葵涌廣場地下A75號舖
#我想食buffet ...
更多
下載 U Lifestyle應用程式
香港經濟日報版權所有©2025
