西式三層架下午茶就食得多，今次見到又一城間安南有越式三層架下午茶，好有新鮮感，價錢又幾吸引，決定一試。
同西式三層架一樣，呢個下午茶餐都有分鹹甜點。鹹甜點之外仲有一碗粉，有牛肉湯河、蟹仔肉鮮茄湯檬同札肉撈檬三款比你揀。我就揀左札肉撈檬，不過太肚餓唔記得比相機食先。碗粉的size只係比散叫的粉小一點，食完都飽左一半。鹹點有5款，先來半隻炭燒大頭蝦，個size都唔細，食落啖啖肉。其他幾款都係越南招牌小食，有炸到金黃的蝦多士、脆卜卜的燒豬肉蝦片、爆餡的鮮蝦米紙卷同非常香口的蒜蓉牛油雞翼。
甜點方面，共有5款，有煙靭但唔痴牙的西米斑蘭糕、軟綿彈滑的法式焦糖焗蛋、有少少苦但咁先至係正宗的越南咖啡奶凍，同埋糯米孖寶 — 椰汁粟米糯米和芒果黑糯米，都係經典的東南亞甜品。款款都精緻好吃。
飲品有兩款選擇，越式青檸冰茶同冰糖雪梨水。只飲熱飲的我揀左冰糖雪梨水，清清甜甜的幾潤喉。
食得多西式三層架，呢個越式三層架真係幾有新鮮感，食物質素高，仲要價錢比西式的平一半有多。呢間餐廳的普通河粉套餐都要百幾蚊一個，呢個下午茶餐平均每人都係150蚊左右，有咁多款野食之餘仲要食得咁飽真係好抵。餐廳範圍夠大所以唔會坐得太迫，環境都幾舒適，鍾意食越南野的不妨去歎下同relax一下。
#社群歎世界 #打卡相我攞獎 #抵食推介
