抵食自助餐(Part One)

我呢個過氣黑洞爛船都有三分釘！所以食自助餐對我嚟講其實仲係好吸引，知道呢間酒店嘅自助餐做緊特價食足四粒鐘都係五百零蚊一位，即刻約埋朋友訂枱去開餐勁㗎啦。 今次喺帝京酒店官網買自助餐券只係用咗$1050/兩位就可以喺平日花月庭食到四個鐘頭全程嘅繽FUN夏日美食巡禮自助晚餐，呢個價錢已經包埋加一真係抵到冇朋友㗎。 呢個自助餐除咗有任食之外仲有任飲！有凍又熱大人細路都有啱嘅飲品，好似有凍檸檬薄荷水、凍檸檬茶、凍柑桔綠茶、自助的咖啡機同埋熱飲機咁。 冰凍海鮮今次有好多款揀好似青口、大蝦、蜆、瀨尿蝦、潮式凍蟹、鱈場蟹腳同埋我最like嘅東風螺。 有老婆大人喺度我梗係可以食殘廢餐啦哈哈！由佢剝俾我食嘅賴尿蝦特別鮮甜，呢啲本地嘅賴尿蝦我覺得好食過外國貨好多囉。 呢個東風螺唔係白烚咁簡單㗎！師傅將佢浸過味所以食落去除咗鮮甜仲有朕香味添。 海鮮仲有男人恩物即開美國生蠔任食嘻嘻！生蠔夠晒新鮮肥美食落仲好鬼滑溜呢，我呢晚係咁咦食咗半打咋！ 除咗生蠔仲有焗蠔今晚有三樣唔同嘅味道揀，我就最鍾意食完呵氣如蘭嘅香蒜薑蔥燒生蠔，夠晒惹味啱我呢啲鍾意重口味嘅人。 想食得健康嘅有大量嘅沙律菜俾你揀，仲有啲乾果、車厘茄、青瓜同埋法邊豆呀咁，鍾意點樣配搭嘅沙律自己砌啦。 頭盤有好多唔同味道嘅芝士跟住仲有口水雞，發達芝士藜麥西瓜沙律、紅菜頭沙律、南瓜沙律、合桃小女子、鰻魚酢物、日式溫泉蛋、泰式鮮蝦沙律、日式味付螺肉沙律、凍肉有煙鴨胸、凍肉拼盤、意大利沙樂美腸、煙三文魚同埋高柏火腿！ 我梗係要攞返碟老婆大人最鍾意食嘅菠蘿配風乾火腿俾佢嘆先啦。 如果鍾意印度嘢食嘅都有好幾樣揀，好似咖喱炒龍蝦鉗、雜菜黃咖喱、印式咖喱雞、薄餅同埋薄脆。 西式嘢有葡式白酒檸檬煮藍青口、野菌牛油寬條麵、車厘子烤鴨胸、香煎盲曹魚柳伴檸檬牛油汁同紅酒雜菜燴牛尾。 不過識食梗係要食呢個火炙黑松露忌廉汁波士頓龍蝦啦。 燒得勁香口嘅龍蝦肉質好鬼爽彈，加埋香噴噴嘅黑松露忌廉汁真係要食多幾轉先得喇。 至於牛肉今次呢個燒紐西蘭大骨扒鍾意嘆牛嘅一定要食，另外仲有燒羊架、酥皮菠菜焗挪威三文魚同埋香腸香腸，就算好似我老婆大人咁唔食牛肉都好多肉食可以揀。 牛肉嘅肉質夠晒軟嫩我老婆大人仲鬼咁細心攞咗條骨俾我嘆，識食梗係食條骨啦不過最緊要娶到個好老婆先係大前提哈哈。