其實我係唔係報錯課程？😱---《下一站...Spain🇪🇸》· Day 3 課堂正式開始

9:15 am 西班牙文課程正式開始。課堂每日都由九點十五分上到去兩點，中間分別有一個30分鐘嘅休息，同埋一個15分鐘嘅休息。我起初以為老師會用英文作為主要語言教書，點知成個課堂都係用西班牙文為主要語言，到底用西班牙文教西班牙文係乜玩法？（有冇人知道係我孤陋寡聞，根本就係咁樣教，定還是真係個教學模式有問題🤨不過我都有諗過其實學英文都係英文教姐😂） 另外，聽啲同班同學講，話因為唔夠人數分開做A1 同 A2兩班 ，所以學校將兩個程度嘅人放咗喺同一班，我要再次重申，我係從來冇學過西班牙文，所以我嘅程度應該係A0 (冇錯係A0😂)，而我上緊嘅呢一個班，基本上個個都已經識講識聽六七成嘅內容(我有三個美國friend都係同我同班，但係尋日同佢哋出去食嘢，佢哋完全可以用西班牙文落單同埋溝通，知咩料啦～🥱)，除咗坐隔離都係英國嚟個朋友，所以佢同我上堂其實都真係幾唔知做緊啲乜😵‍💫 今日上堂嘅內容，基本上一次過輸入咗好多內容俾我哋，A-Z發音、數字、簡單自我介紹、問候語等等。雖然九成聽唔明，但係都要盡力抄筆記，然後再自己寫返啲拼音上去。 完晒所有課堂之後去咗食飯～～是日午餐，盛惠€6.40 因為下晝已經冇晒課堂，距離今日學校安排嘅額外活動又仲有一段時間，所以出咗去超市買水同埋少量乾糧。 一包蛋糕、一袋麵包、一Pack 六支裝大水€4.54 今日學校舉行嘅額外活動係Town tour 。一如我所料，呢個tour又係一個全西班牙文嘅Tour ，雖然完全聽唔明佢講解，但係跟住個導遊行，都行咗一啲未去過嘅地方，或者我會話唔係今日跟佢行過，我都唔知有嗰一啲地方。 📍必到景點 : Catedral de Santiago de Compostela Tour 完咗之後（其實我提早走咗😂），就喺Google Maps搵咗一間餐廳食今晚晚餐，見到呢一間亞洲餐廳評分都唔錯，所以就決定試一試佢。俾錢嘅時候同老闆娘傾咗幾句，發現佢係上海人。 同埋一直覺得一啲本地餐廳未必識講英文，嚟咗三日西班牙的確俾咗一個咁嘅印象我，因為真係預咗幾次英文溝通唔到，但係到目前為止食咗兩間餐廳 (外賣&快餐唔計），都係可以用英文溝通。 📍Asian Street Food 我分別叫咗一碗其實係烏冬嘅拉麵（因為佢餐牌真係寫拉麵） 同埋叫咗一個豬肉包，其實係類似菜肉包，不過冇菜。埋單計埋杯雪碧，總共€12.8 總結，Day 3 正式開始上堂，其實已經發現自己報錯左課程，不過唔緊要啦（都冇得緊要🤧），我參加今次呢個課程主要目的係想去啲未去過嘅地方同埋識吓唔同人，學識西班牙文兩個星期又點會夠呢～。嚟咗三日，都算係已經達到目標，希望接下來嘅日子繼續充實精彩。 Day 3 完。✍️ Instagram: _ooahlongtea YouTube: ahlong’s vlog #旅行 #西班牙 #旅遊 #英國 #歐洲 #行程 #獨遊 #vlog #blog (此文章由U Blog 同步發佈至社群)