2024/06/06

【感覺去了外國旅行一樣 @ 愉景灣酒店】

【感覺去了外國旅行一樣@愉景灣酒店】今年Aidan生日之旅，我哋選擇了好受歡迎既「愉景灣酒店」慶祝，每次去愉景灣都感覺去了外國一樣，歐洲小鎮風情，有打卡教堂、有沙灘、有公園、有室內遊樂場，仲有好多餐廳，玩兩日一夜都玩唔哂！我哋好早就去Check in，酒店職員好親切，好熱情同兩兄弟玩，知道哥哥生日，仲送左隻小熊公仔俾佢，弟弟都有份呢，好開心呀！酒店大堂好開揚，設計充滿海洋氣息，令人感覺到度假既氣氛。今次入住「愉景灣酒店」既海景豪華客房，一入房兩兄弟都嘩嘩聲呀！L 形設計既落地玻璃全部面向海景，房間有一半被海包圍，一望無際既大海景真係勁靚，瞓係床上就可以睇到日出喇！房間寬躺舒適，有兩張大沙發，張特大Queen size床好舒服，床褥軟硬適中，當晚都瞓得好舒服呀！我哋仲加錢join左「童玩樂趣及房間慶祝佈置服務」，真心驚喜呀！除左有禮物玩具之外，房間佈置得勁靚，小帳幕兩兄弟一見到就即刻衝入去玩喇！我只係自己加多個6字氣球，生日氣氛up up up！影左勁多靚相呀！海景客房重點之一就係浴室內可以望海景嘅特大浴池啦！我哋仲買左個泡泡浴球，可以俾兩兄弟玩泡泡浴。浴池大到一家四口齊齊浸浴都好鬆動，而且係對正大海，一邊浸浴，一邊望住個大海，身心都可以放鬆哂，好享受呀！酒店有兒童遊戲室、Spa Botanica、健身室、餐廳和泳池等設施。（泳池會係4月頭重開。）酒店既「兒童天地」有幼童滑梯、夾公仔機、懷舊遊戲機和圖書等，可以俾小朋友打發時間。係酒店休息一陣就搭車去愉景灣南廣場食Lunch 同行街。再帶小朋友去大白灣沙灘公園玩，呢度係香港唯一嘅沙灘遊樂場，有得玩水、玩沙、玩滑梯韆鞦，真心好玩，兩兄弟玩到唔捨得走添！玩到黃昏時間我地就番酒店旁邊既玻璃教堂打卡影相睇日落。夜晚我地係愉景灣酒店既「Café bord de Mer & Lounge」食自助晚餐，全海景餐廳用餐環境乾淨舒適，令人坐得好舒服。侍應們都好有禮貌，態度親切。自助晚餐主題係「非一般炭燒自助餐」，酒店特別安排左大廚係戶外海濱露天區域即場為大家燒，有炭燒羊排、虎蝦、西冷牛扒、三文魚等，可以一邊欣賞夜景，一邊享受美食。室內款式選擇都好多呀！有冷盤、粉麵、海鮮、日式小食、刺身壽司、甜品和多款熟食。飲品有芒果汁、柑桔檸檬水和咖啡奶茶任飲。我同老公食咗好多海鮮，長腳蟹和麵包蟹都好鮮甜，幾正！兩兄弟一人一碗湯粉麵，可以狂食甜品和水果，佢哋好開心呀！第二朝瞓到自然醒好舒服，我地預約了9點係酒店餐廳食自助早餐，早餐款式選擇都多，有各款既熱食、沙律、冷盤、中式點心、炒伊麵、粥品、炸物、麵包、蛋糕和鬆餅等。弟弟最愛既乳酪都有多款口味，食到好滿足。食飽飽後我哋就去參加酒店既「親親馬兒」活動，每人包一份馬飼料，可以親手餵馬仔食嘢，好好既體驗呢！玩完再上房俾兩兄弟係個大浴池再玩多陣水，我同老公就望下個大海景嘆多杯茶，好寫意！最後當然要去埋Epicland 歷奇王國玩啦！小朋友一次過放電大成功！今次係「愉景灣酒店」兩日一夜真係好滿足，無時無刻都望到大海景，感覺好放鬆，仲影咗好多靚相添，完全唔捨得離開間房，我哋已經計劃下一個假期再黎玩多次，下次要去泳池游埋水呢！ ————————————— 歡迎連絡安妮媽媽： Facebook專頁：安妮媽媽親子日記 IG: @Annie_mama_diary | 安妮媽媽親子日記 E-mail : AnnieMamaDiary@gmail.com #愉景灣 #愉景灣酒店 #無敵海景 #DiscoveryBay #悠閑度假 (此文章由U Blog 同步發佈至社群)...更多

【 感覺去了外國旅行一樣 @ 愉景灣酒店 】

【感覺去了外國旅行一樣 @ 愉景灣酒店】