Jeju & Busan| 釜山濟州 |沿海地區打卡8日7夜遊(2)

Day 2 Jeju➡️Busan 一大早就要出發去機場，坐內陸機飛機去釜山。途中經過彩虹石壆，同日出一齊同框嘅畫面，真係一個好嘅開始。 去到機場實在太早，原來內陸機唔需要提前咁多去到機場check-in，佢哋最多會提前一個半鐘可以check-in，好多人都係提前一個鐘左右到機場，半個鐘內check-in，然後入閘過安檢，成個過程10分鐘都唔使。而閘口附近嘅coffee shop同熟食店都好多人排緊隊買早餐，所以唔需要擔心冇嘢食，如果時間允許，甚至可以食個靚早餐先上機。 由濟州飛釜山，時間為一個鐘，但實質飛行時間只有半個鐘，所以好快就落機啦，係我搭過最短時間嘅機，根本冇時間補眠就落機啦🥹 落機之後，行出對面馬路，就會見到輕軌嘅指示牌，跟住我就由機場搭去最近民宿嘅廣安里站。 由於一條路線係輕軌，一條係地鐵綫，所以中間係需要轉乘嘅。中間轉成需要出閘，再由地鐵站入閘，搭到廣安里站，再喺附近出口轉搭巴士。😂由於訂咗海景嘅民宿，所以地點會比較近海邊，遠離地鐵站，所以轉巴士就比較方便。 ------------------------------------------------------------------------------------------------------ 民樂➡️西面站 擺好行李，執返個樣之後，我哋就出發去西面站，去Running Man嘅主題館打卡啦。而我哋用Google Map發現其實搭巴士係最方便嘅。 輸入地址之後，就顯示有咩巴士路線可以搭，就好似圖中顯示嘅，有唔同巴士路線可以揀，起點終點站，時間價錢，轉乘站，步行時間都可以清楚睇到。唯一需要注意係，灰色顯示嘅步行時間，可以揀比較短嘅，咁就可以揀最近嘅巴士站上車啦。 西面站嘅商場地下就已經有一間Auntie Ann，建議可以先買一個酸忌廉味嘅麵包條試試，現場即叫即炸，熱辣辣加上大量嘅酸忌廉粉，如果唔係太熱，就可以成條啪🤤一pack有六條，兩個人輕鬆KO。 食飽飽就可以入商場，直上10樓Running Man釜山店。上到去就會見到呢個Running Man吉祥物，跟住佢個動作擺好之後，地下會有貼紙提示企邊個位置📸️最啱影相。 如果行程唔定，自由度比較大嘅話可以去到現場先買飛，我哋喺Klook上邊即時買，價錢係一樣嘅，可以用自己嘅信用卡俾錢，慳返啲現金，唔使驚冇晒現金要再唱。 買好飛之後留意番email入面嘅QR code，show俾職員睇，然後佢會派發每人一條感應手帶，跟住去到入口，面前有三隻門，分別係高級中級同初級三個程度。睇開Running Man都知道佢哋會唔會好多關於運動同身體反應協調嘅遊戲，而呢度入邊就係有相關嘅遊戲俾你體驗。你只需要你開始揀返自己想要嘅體驗程度(建議量力而行)，譬如揀初級，入去之後所有體驗嘅遊戲都會係初級程度，難度比較低完成度比較高。 入面嘅好多遊戲，都只需要用感應手帶拍一拍感應區，遊戲就會開始。可以先睇一下人哋點樣玩，又或者睇多幾次遊戲說明，先開始玩。 譬如入邊有籃球機，有吊環，有迷宮，有協調類既拍拍機，遊戲都好清晰，亦都好啱小朋友一齊玩。由於一開始太高估自己，揀咗中級，玩得有點吃力，最後得幾個game係完成到。不過志在體驗，大概可以逗留一個鐘時間。 玩完出嚟之後，感應手帶需要還返俾職員，佢哋會根據完成遊戲嘅數量，換返相應嘅襟章俾你做紀念。唔需要擔心，完成到一個遊戲都會有襟章☺️ 而門票有包含隔離嘅米田共和國，係一個大便主題體驗館，就係隔離，開返email比職員登記之後，職員會排放一本簿仔，同你介紹返呢本簿仔入面有好多問題，係俾你用黎一邊體驗，一邊搵答案嘅。同啱啱一樣，答案唔同數量嘅題目，就會有唔同嘅紀念品可以換領。 入面有好多視覺錯覺嘅打卡位可以影相，人唔多可以盡情影☺️ 同時間亦都可以留意題目同隱藏喺周圍嘅答案。 入面嘅都有唔同嘅區域，每個區域都有唔同嘅玩法，譬如有大型波波，又或者模仿腸道嘅繩網陣，都係比較特別，而同時間亦都要搵答案寫落簿仔度，時間不知不覺中流逝，到玩晒出嚟過咗一個鐘，天都開始黑啦。 Running Man Busan Website: https://runningman2.modoo.at/ Map: 南韓 Busan, Busanjin-gu, Jungang-daero, 672 삼정타워 10F 부산광역시 부산진구 중앙대로 672 삼정타워 10F Running Man 釜山 - Google 地圖 ------------------------------------------------------------------------------------------------------ Running Man Busan➡️三代豬肉湯飯 行出商場之後，我哋就去搵出名嘅三代豬肉湯飯做晚餐。入面好多都係本地人黎食，我哋叫咗一個豬肉湯飯，一個五花肉餐餐，隔離有拌菜，可以因應自己口味去夾。呢個湯飯，味道比較清淡，可以加附送嘅大醬，又或者枱面嘅其他調味料開調校味道。豬肉吾韌，好軟熟，加埋泡菜生菜拌菜一齊食超地道又超正😋😋😋 松亭3代豬肉湯飯 Map: 33 Seomyeon-ro 68beon-gil, Busanjin-gu, Busan, 南韓 부산광역시 부산진구 서면로68번길 33 松亭3代豬肉湯飯 - Google 地圖 ------------------------------------------------------------------------------------------------------ 西面站➡️釜山塔 食飽之後，大概八點，見仲有啲時間，我哋決定去多一個景點，就係釜山塔啦😆 同樣地，我哋選擇搭巴士喺西面站過去，車程大概40分鐘，落車之後跟住地圖行，基本上抬頭都已經見到呢個標誌性嘅建築物，釜山塔。釜山塔喺唔同顏色嘅燈光映照下，黑夜之中特別出眾，去到入口位，可以根據自己需要揀唔同嘅上山路線，夜晚睇落就冇乜分別，建議大家揀有比較多路燈嘅路線上山。只需大概10分鐘，就嚟到釜山塔既正門。如果想上觀景台睇夜景嘅，可以喺正門買飛就可以。建議日落時候嚟，塔下邊嘅廣場周圍都有打卡位，都可以上觀景台睇釜山日落時候既城市景色。 Busan Tower Instagram: Busan Tower (@busantower_official) • Instagram photos and videos Map: 37-55 Yongdusan-gil, Jung-gu, Busan, 南韓 부산광역시 중구 용두산길 37-55 釜山塔 - Google 地圖 #酒店 #jeju #行程 #南韓 #Busan Tower #韓國 釜山 行程 #韓國 釜山 #松亭3代豬肉湯飯 #Running Man (此文章由U Blog 同步發佈至社群)