任食兩款生蠔 X 即煮海鮮窩 X 醬燒鮑魚 X 和牛刺身 夠回本 @ Cafe 8 Degrees ( 土瓜灣8度海逸酒店 )

自從上次食過土瓜灣8度海逸自助餐後，覺得真係好啱自己食，心思思下不足一個月又去多次，意想不到已經又改動了食物陣容，比上次更吸引，講多無謂，一於同大家分享下。 生蠔 因為衛生與成本問題，香港好多自助餐已經無生蠔供應，除非收得好貴，又或者用平價蠔頂住，但意想不到，竟然有法國 Fine De Claire 以及美國 Taylor Pacific Rock兩款供應，實在有點令人喜出望外。 兩款蠔都係即開，而且食到離場都仲有，確實係一個回本位。 即煮海鮮 魚湯煮鮑魚、東風螺、鮮蝦、青口、鮮魷及沙白，夠晒鮮味。 值得一提係醬燒鮑魚，用上新鮮鮑魚即烤，塗上醬汁好香口，而且口感Q彈。 另外有上次食過既蒜蓉辣椒焗蠔及芝士焗蠔，兩款 refill 得都好快，個人就鍾意蒜蓉辣椒，因為辣辣地夠惹味。 海鮮 因為有即開生蠔，所以海鮮類只有長腳蟹爪、青口、翡翠螺及海蝦，但質素一點都不差，所以見好多人拎大盤蟹爪慢慢嘆。 刺身 係Buffet有和牛刺身真係好少見，尤其是放係刺身吧旁邊，知道既人不多，論油份又真的不多，反而帶肉香。 至於刺身有成五吋長赤蝦，仲有赤貝、魷魚、三文魚、吞拿魚、鯖魚、油甘魚、玉子及蟹柳，種類是出奇地多，而且質素不錯。 壽司 必食一定係燒炙牛肉卷，雖然並非即炙，但食落又有油香。 其他壽司仲有鮭魚壽司、燒炙鮭魚壽司、鮪魚蔥軍艦及加洲卷。 Carving Station 有燒肉眼及脆皮豬腩。 湯 西湯是南瓜忌廉湯，入口幾甜滑，而中湯就係蟲草花螺頭燉雞湯，好有家常湯的感覺。 熱葷 種類好多，同埋可能顧客都係家庭街坊客為主，所以菜色都偏向亞洲菜。 燒羊扒比較熟，但羊味輕，易於比客人接受。 泰式咖喱大頭蝦 食落幾惹味，個汁仲可以拌白飯。 川辣炒雞球 辣辣地又幾啱送飯。 其他有黑椒咸菜炒金錢肚、香烤泰式豬頸肉、泰式香茅燒春雞、韓式泡菜芝士煮藍青口、小籠包、日式牛腩配香辣海藻、紅酒燴牛尾、黑椒花蜜牛仔骨、XO醬時菜炒蝦球、南乳花生豬手、蔥花蟹籽三文魚炒飯、避風塘椒鹽荷蘭比目魚、雜菜關東煮、蒜蓉炒雜菜、椒鹽軟殼蟹同埋香煎海盲鰽配菠蘿沙沙。 雖然無咖喱專區，但都有咖喱雞、咖喱牛腩及雜菜。 回本位同大路菜色分享過，又到其他菜色。 前菜 想過下口癮，有韓式雜錦前菜、日式雜錦前菜、海蜇、特色醉雞翼及酸雜菜配燻蹄。 Cold Cut 及芝士 至於怕食得太多肉類，想來點輕食，當然有好選擇，不妨在雜錦芝士碟、凍肉盤、鮮蕃茄水牛芝士沙律配香草汁、煙三文魚、秋葵沙律、意大利雜菌沙律配扒南瓜、日式蟹籽沙律、風味海鮮沙律及DIY沙律之中，慢慢揀。 甜品 主打Movenpick雪糕，口味有瑞士朱古力、草莓、Espresso Croquant、雲呢拿及 Panna Cotta Raspberry，獨立細杯夠衛生，仲可以食多幾款。 特色甜品有即製榴槤班戟同格仔鬆餅配雪糕，但榴槤要趁熱食，會香好多。 上次沒遇上的芒果拿破崙，今次再度出現，當然成了受圍剿的對象，出得快，消失得亦快，芒果是預期中的香甜，夾層的酥脆口感，滋味無窮。 Tiramisu是原個上，不減個人對佢鍾愛，濕潤的口感，可可粉的甘甜，非常出色。 其他甜品仲有北海道3.6牛乳布甸、迷你雜錦法式蛋糕、日式芝士蛋糕、榴槤慕絲餅、雜果香檳Jelly、牛油麵包布甸配雲呢拿汁、奧利奧曲奇芝士餅、班蘭雪坊蛋糕、栗子忌廉蛋糕、紐約芝士蛋糕、法式焦糖燉蛋、果汁Jelly以及葡撻，其實水準好好，但好多都係原個上，經常給客人弄得一塌糊塗，影響了感觀，如果可以改成迷你版會好好多。 至於水果就有菠蘿、哈蜜瓜及西瓜，食得太飽都要幫助消化。 Facebook 酒店專頁 : Cafe 8 Degrees 餐廳專頁 : 8度餐廳 地址 : 土瓜灣九龍城道199號8度海逸酒店地下   電話 : 21261960   味道 : 4  環境 : 4  服務 : 4  衛生 : 4  抵食 : 4  位置 : 4   希望各位喜歡這篇文章的朋友，請在我的專頁上剔"LIKE"，當作小小的鼓勵吧!謝謝!   http://www.facebook.com/foodiephilip #酒店 #自助餐 #酒店餐廳 #土瓜灣 #8度餐廳 #美食焚化爐 #BUFFET (此文章由U Blog 同步發佈至社群)