每次諗起食火鍋，就會罪惡感升100倍。但最近喺IG見到呢度間重慶火鍋店開創左生酮火鍋。設計、精選左令人食得開懷又唔會致肥嘅生酮火鍋，今日一於俾個藉口自己放肆吓。
一入門口就見到生酮飲食 KOL唐貝詩做封面嘅menu，決定跟住嚟嗌。
湯底揀左鴛鴦鍋，一邊要養生花膠雞鍋 ($58一位)。花膠大大件，顏色又靚；而雞件亦好有雞味，睇返d介紹，原來用左三黃雞，所以肉質特別嫩滑。建議唔好浸喺火鍋太耐，咁會更加食到雞嘅觧味。
另一邊就叫左個皮蛋香菜鍋 ($38 一位)。驚喜係原隻皮蛋加原條芫荽入湯，皮蛋唔會滾爛晒，而芫荽連埋根莖，就散發到更香濃嘅味道。
火鍋點可以無肉，按好味程度排序係：
1. 黑豚腩肉(半份 $48)，雖然係豬腩肉，但食入口完全唔覺得肥膩，入口肉味極濃，肉質脆嫩。
2. 嫩牛肉 (半份 $48)，肉質口感唔錯，極輕易咬開。
3. 鰻魚 (白鱔) (半份 $58) ，爽口無腥味，魚肉肥美嫩滑。
4. 麻辣牛肉 (半份 $48)，嘩！味蕾激戰，薄薄嘅牛肉片沾滿了各式辣辣嘅香料，入口極度辛辣。
主食叫左極創新嘅海帶麵 (半份 $38) ，原來用海帶製成嘅麵條，主要係纖維，卡路里接近零，麵質入口又爽又脆。健康又飽肚，呢個真係一定要試。
仲叫左d菜平衡吓，多款素菜望到都覺得賞心悅目，尤其係蔬菜類，非常新鮮翠綠，洗得又乾淨，食得健康又安心。
皇帝菜 (一份 $28)、油麥菜 (半份 $18)十分鮮甜美味。
淮山條 (一份$48)鮮淮山爽口、紫淮山綿蜜鬆化。
萵筍條 (半份$18)烚完夾起依然見到鮮嫩嘅翠綠色，入口爽脆。
凍豆腐 (半份 $18)即冰豆腐，有咬口、有豆香。
炸豆皮 (半份 $38)非常吸睛，炸得金黃色，烚完入口軟腍之中帶一點煙靭。
嚟得食生酮火鍋，飲品當然要試埋生酮特飲啦，叫左青檸梳打($48)、生酮雜莓汁雞尾酒($48)，特飲用左生酮糖去調製，甜味剛剛好。前者有淡淡嘅青檸酸味，可口；後者酒味唔濃，非常易入口，雜莓嘅酸味令飲品更怡神。
最後食埋甜品-紅糖糍粑，呢嗰個真係非常好味，糍粑炸得脆口，紅糖又唔會太甜。
最後要讚吓餐廳嘅細心，枱面放有生酮醬油，點肉食能提升肉味，重口味人士亦得到大滿足；枱面放有計時器，餐單有時間建議，跟住指示，就可以食到火喉最佳嘅美食；入座仲每位免費送上雪耳紅棗糖水，夠滋潤。
