西班牙之旅剩下四日🕰️，都係時候去買返少少手信。所以今日決定向城巿中心南邊出發，去一個超級出名，亦都係西班牙唯一嘅連鎖百貨公司 —— El Corte Inglés 英格列斯百貨。
由宿舍行去百貨公司，需時大概25分鐘，途中會經過一個公園，而圖中嗰條路係必經之路，完全唔明點解條路嘅盡頭要放個咁恐怖嘅雕像…😶🫣
百貨公司唔計停車場，總共有五層。我會形容係高配版一田&千色店+ IKEA 嘅合體版商場。
連日本漫畫（全部翻譯咗做西班牙文，可以見到其實日本文化都幾勁）、黑膠唱片都有得買。
最誇張係百貨公司入面，有成間超級市場喺度，唔係普通Lidl 、Sainsbury’s 、百佳、惠康嗰種規模，而係真係超級超級大。
嚟買手信之前我已經上網做過功課，西班牙最出名嘅係杏仁糖、無花果朱古力同埋花草茶。不過因為天氣實在太熱，所以我就冇買到朱古力，只係買咗Hornimans花茶（聽人講洋甘菊味最好飲）& 杏仁糖（題外話，盒杏仁糖搵咗勁耐都搵唔到，經過同一個地方三次先發現佢🙄🙄）
買完手信之後，就去咗郵局買郵票寄明信片。
是日晚餐去咗一間 Google 4.6 星🌟嘅餐廳，我覺得都應該係啲本地人先會去嘅餐廳，一來餐牌無英文，二來餐廳嘅位置係喺啲巷仔入面，唔算當眼位置。
我叫咗一份三文治🥪、同埋一碗沙律🥗（本身冇預計過沙律咁大份），連埋杯可樂，埋單€11.5 ，完全係可以接受程度，重點係飽到食唔晒份沙律。
本身諗住返到宿舍，抖一陣，打埋個Blog，今日就完結。點知返到宿舍一坐低，美國個朋友就問玩唔玩 beerio kart🍺（其實都係前幾日同佢哋傾偈先知係乜嚟，我估應該係一啲美國年青人會玩嘅遊戲）。其實飲四罐啤酒本身應該係冇問題，但係因為遊戲規則係要衝線之前飲晒先算完成賽事（總共挽咗八Round，一局有啤酒一局冇啤酒，卡啦卡啦咁樣去）。所以玩完之後連張凳都唔記得拎返走，同埋本身諗住返房之後，坐一陣刷埋牙就瞓，點知一坐低就瞓到今朝😂😂。
Day 9 完。✍️
Instagram: _ooahlongtea
YouTube: ahlong’s vlog
#旅行 #西班牙 #旅遊 #歐洲 #行程 #獨遊 #vlog #blog
(此文章由U Blog 同步發佈至社群)
