2024/12/18

🦄認真地為食。有誠意地長氣🦄

介紹返💁🏻‍♀️ 。。 🇭🇰海鮮火鍋放題在九龍灣 🇭🇰 。千海水產海鮮火鍋放題。淘大商場3期2樓。即撈海鮮火鍋放題兩小時晚市火鍋放題星期一至四任何時段。HKD338 + 10% 7:30前離座。HKD298 + 10% 9:00後入座。HKD308 + 10% 星期五至日公眾假期及其前夕任何時段。HKD358 + 10% 7:30前離座。HKD318 + 10% 9:00後入座。HKD328 + 10% 🤫 就喺剛剛嘅星期一..我哋入座時間係晚市嘅頭輪五點鬆少少..啱啱好喺七點半前埋單還枱..所以享有三嚿水未加一兩粒鐘放題嘅優惠~ 🤫 真心今次放題體驗好壞參半..為此我決定由唔同嘅食物區域開始講起..首先當然係講吓大家都好關心嘅撈海鮮區域～咁一入火鍋店門口就會立即見到呢個好養眼嘅即撈海鮮檔..而其實個檔口嘅海鮮玻璃櫃並非幻想中咁大😅如果淨係計玻璃箱..佢哋大概總面積係三張麻雀枱咁大啦~然後玻璃箱呈U型設計..入面就包圍住三位叔叔姨姨喺度做到冇停手咁為食客清洗海鮮～ 🤫 我同腳仔都幾欣賞即撈海鮮部分..佢哋總共十二個玻璃箱分別放咗海螺鮑魚..蝦蟹各兩個品種同埋四種貝殼類..其中蝦蟹蜆我哋都食齊..淨係冇幫襯鮑魚同海螺..因為據稱鮑魚個殼洗得唔乾淨真係會瀬嘢再加上我哋都唔係鮑魚迷..所以選擇直接跳過..但就蟹嚟講🦀當晚兩種蟹類我總共食咗四隻..雖然蟹唔算大隻但係相當鮮甜..仲隻隻都有少少蟹膏..個人覺得蟹絕對係加分位💯 🤫 然後蝦就有大頭蝦同基圍蝦兩種..個人覺得基圍蝦相對爽甜..大頭蝦肉質偏韌但帶有大量蝦膏..呢啲就鹹魚白菜各有所愛嘅..不過海鮮咁生猛直接𢳂上嚟即煮..新鮮程度絕對有保證🦐 🤫 至於腳仔最鍾意食嘅蜆類..常見嘅沙白灰蜆同埋美國大蜆質素相當好..隻隻都大大隻..最重要係鮮甜冇沙..唯一係最旁邊較少見白色殼大大隻嘅唔知咩貝殼類..肉質雖然爽甜但係真心唔夠時間畀佢吐沙..十隻有六隻都係成口沙..真係食到懷疑人生🤯我都唔知係火鍋店嘅責任定係我當日比較黑仔..呢啲就留返畀大家自行定奪喇~ 🤫 再嚟就講吓..蔬菜丸類同埋火鍋配料嘅凍櫃..呢度蔬菜丸類品種多但奈何物種太多時間太少..所以我哋都冇太多嘅停留..只係簡單攞咗黃芽白蟲草花粟米同埋蓮藕就匆匆離去 🤫 火鍋配料種類呢度真心多元化..比較貴價少見嘅鵝腸海蜇頭..牛柏葉脆肉鯇花膠鵪鶉蛋..仲有蛋餃燕餃同埋爽滑嘅墨魚片水魷冇殼生蠔帆立貝呢度都一應俱全..全部質素都好唔錯..呢個位抵讚嘅～ 🤫 另外熱食方面..大部分都係自取嘅..新鮮滾熱辣嘅蒸籠燒賣蝦餃小籠包牛肉球..普通嘅炸物午餐肉同埋鴨胸..甚至好出名嘅焗榴槤炸鮮奶..仲有個個都話必食嘅魚子醬多士都可以喺度自己拎..呢部分樣樣都應該幾好..唯獨是嗰個避風塘大頭蝦就麻麻地..感覺似係賣唔出嘅即撈大頭蝦拎去煮..蝦肉唔太新鮮..大家可以小心避雷 🤫 至於用QR code落單嘅熱食部分..我就梗係唔會放過大家都話必食嘅鵝肝多士啦..不過Sorry佢哋啲鵝肝煎得太乾而且好厚粉..實在令我失望嘅😥反而係隻乳鴿有驚喜😏估唔到放題都可以做到皮脆肉嫩..真係幾Juicy㗎👍🏻 🤫 至於肉類方面..打邊爐必食嘅牛肉片呢度分兩種..澳洲和牛同牛肩胛兩隻牛味都好香濃..媲美牛大人最貴嗰Set 嘅牛肉..而且肥瘦均勻仲切得夠薄片..真係做得到十秒八秒就食得~ 🤫 最後就講吓湯底..佢哋總共八隻湯底..簡單嘅有蕃茄豬骨椰子雞..野菌魚湯..昆布柴魚同花膠雞或者人蔘雞湯底..我哋就揀咗較為特別啲嘅龍蝦頭鍋..湯底嚟到嘅時候又真係有一隻大大隻嘅龍蝦頭喺度..湯汁相當鮮味..係一個唔錯嘅選擇👍🏻 🤫 講到最後其實呢度各樣食物質素係放題水準以上..種類繁多任君選擇..正正因為佢哋咁多嘢俾你揀俾你食..但係放題時間就只有兩粒鐘..再加上佢哋地方大到冇人有..所有食物集中喺大門口附近位置..如果好似我哋咁唔好彩被安排坐喺側過側田入到無可再入嘅區域..行出行入又會有相當數量嘅職員推住車仔阻住條路嘅狀況..再加上佢哋裝蔬菜丸類嘅食物盤同裝海鮮嗰個冰桶都偏細..導致時間不足..絕對係成個火鍋放題最大嘅破綻..睇嚟下次翻兜都係要食平日晏晝三粒鐘先至夠皮🤯 。。翻兜指數：🙆🏻‍♀️🙆🏻‍♀️🙆🏻‍♀️🙆🏻‍♀️（5個🙆🏻‍♀️為翻兜爆燈）。。。。 #香港搵食 #九龍灣搵食 #九龍灣美食 #九龍灣 #吃在香港 #香港美食 #打邊爐 #火鍋 #火鍋放題 #海鮮 #海鮮火鍋放題 #千海水產海鮮火鍋放題 #即撈海鮮火鍋放題 #九龍灣打邊爐 #九龍灣火鍋 #打卡熱點 #全城熱話 #即撈海鮮 ...更多